काठमाडौं । सुपर मादी हाईड्रोपावर लिमिटेडको विद्युत बिक्री आम्दानी वृद्धि भएसँगै र वित्त खर्चमा कमी आएसँगै नाफामा सुधार आएको छ । कम्पनीले गत आर्थिक वर्ष २०८२/८३ को चौथो त्रैमाससम्म ४२ करोड ५९ लाख रुपैयाँबराबरको खुद नाफा आर्जन गरेको हो ।

यो रकम अघिल्लो आवको सोही अवधिको तुलनामा २७७.६८ प्रतिशतले बढी हो । अघिल्लो आवको चौथो त्रैमाससम्म भने कम्पनीले ११ करोड २७ लाख रुपैयाँबराबरको खुद नाफा आर्जन गरेको थियो । यस अवधिमा कम्पनीको विद्युत बिक्री आम्दानी पनि बढेको छ । अघिल्लो आवमा १ अर्ब १२ करोड ६२ लाख रुपैयाँ विद्युत बिक्री आम्दानी गरेको कम्पनीले समीक्षा अवधिमा भने १ अर्ब ३३ करोड ४ लाख रुपैयाँ आर्जन गरेको छ ।

कम्पनीको वित्त खर्च ५४ करोड ३६ लाखबाट घटेर ४६ करोड ५ लाखमा सीमित बनेको छ । ह्रासकट्टी खर्च भने ३० करोड ६७ लाखबाट बढेर ३१ करोड ७९ लाख पुगेको छ । यस्तै अघिल्लो आवमा ७ करोड २८ लाख रहेको अन्य सञ्चालन खर्च पनि बढेर ८ करोड ८७ लाख पुगेको छ ।

कम्पनीको चुक्तापूँजी २ अर्ब ३१ करोड ५२ लाख रुपैयाँ छ । कम्पनीको रिजर्भको आकार १४ करोड १४ लाखबाट बढेर ४५ करोड १४ लाख पुगेको छ । त्यस्तै कम्पनीको कुल चालु सम्पत्ति ४७ करोड १ लाख र कुल चालु दायित्व २२ करोड ५७ लाख रुपैयाँ रहेको छ । समीक्षा अवधिसम्म कम्पनीको प्रतिसेयर आम्दानी (ईपीएस) १८.४० रुपैयाँ, प्रतिसेयर नेटवर्थ ११९.५० रुपैयाँ, प्रतिसेयर कुल सम्पत्तिको मूल्य ४१५.२२ रुपेयाँ र तरलता अनुपात २.०८ प्रतिशत कायम भएको छ ।