काठमाडौं । गरिमा विकास बैंक लिमिटेडको नाफामा ३५ प्रतिशत बढीको वृद्धि देखिएको छ । बैंकले सार्वजनिक गरेको गत आर्थिक वर्ष २०८२/८३ को चौथो त्रैमासिकसम्मको अपरिष्कृत वित्तीय विवरण अनुसार अघिल्लो आवको भन्दा ३५.३४ प्रतिशतले नाफा बढेको हो ।

विवरण अनुसार अघिल्लो आर्थिक वर्षको तुलनामा गत आर्थिक वर्ष बैंकको खुद नाफा, खुद ब्याज आम्दानी र प्रतिसेयर आम्दानीमा उल्लेख्य वृद्धि देखिएको छ । गत आर्थिक वर्षको अन्तिमसम्ममा बैंकले १ अर्ब ६८ करोड ८६ लाख रुपैयाँ खुद नाफा कमाएको छ । अघिल्लो वर्ष यस्तो नाफा १ अर्ब २४ करोड ७६ लाख रुपैयाँ रहेको थियो । समीक्षा अवधिमा बैंकले ३ अर्ब ८१ करोड ५६ लाख रुपैयाँ खुद ब्याज आम्दानी गरेको छ । यस्तो आम्दानी अघिल्लो आर्थिक वर्षको सोही अवधिमा ३ अर्ब ६१ करोड २० लाख रुपैयाँ रहेको थियो । समीक्षा अवधिमा बैंकको सञ्चालन नाफा ४२.६५ प्रतिशत बढेर २ अर्ब ५८ करोड १ लाख रुपैयाँ पुगेको छ ।

असुलीमा आएको सुधार तथा जोखिम व्यवस्थापनका कारण गत आर्थिक वर्ष बैंकले ४ करोड ९० लाख रुपैयाँ बराबरको इम्पेरमेन्ट चार्ज छुट्याएको छ । अघिल्लो आर्थिक वर्षमा यस्तो चार्ज ६४ करो ७० लाख रुपैयाँ थियो । समीक्षा अवधिमा बैंकको प्रतिसेयर आम्दानी २८ रुपैयाँ ४ पैसा पुगेको छ । त्यस्तै प्रतिसेयर नेटवर्थ १७७ रुपैयाँ २६ पैसा रहेको छ  । बैंकले साधारण सेयरधनीहरूका लागि लाभांश वितरण गर्न सक्ने सबल क्षमता बनाएको छ । नियमनकारी समायोजनहरूपश्चात् गत आर्थिक वर्षमा बैंकको खुद वितरणयोग्य नाफा १ अर्ब २१ करोड ६९ लाख रुपैयाँ रहेको छ । अघिल्लो वर्षको सञ्चित नाफाबाट बोनस सेयर तथा नगद लाभांश समायोजन गरेपछि असार मसान्तसम्म बैंकको कुल वितरणयोग्य नाफा १ अर्ब २१ करोड ७९ लाख रुपैयाँ कायम भएको छ । साधारण सेयरधनीहरूका आधारमा बैंकको प्रतिसेयर वितरणयोग्य नाफा २० रुपैयाँ २३ पैसा कायम भएको छ ।

बैंकको चुक्ता पूँजी अघिल्लो आर्थिक वर्षको ५ अर्ब ६८ करोड ५ लाख रुपैयाँबाट बढेर ६ अर्ब २ करोड १४ लाख रुपैयाँ पुगेको छ । सञ्चित नाफा र अन्य जगेडा कोष गरी बैंकको कुल इक्विटी १० अर्ब ६७ करोड ३२ लाख रुपैयाँ पुगेको छ ।