काठमाडौं । नेपाल स्टक एक्सचेञ्ज (नेप्से) मा सूचीकृत कम्पनीहरूले आफ्नो सञ्चित मुनाफा प्रयोग गरेर बजारबाट आफ्नै सेयर फिर्ता खरिद तथा सेयर कित्ता विभाजन गर्न पाउने भएका छन् । अर्थ मन्त्रालयले सार्वजनिक गरेको ‘पुँजी बजार सुदृढीकरण तथा पुनरूत्थान कार्ययोजना, २०८३’ मार्फत नेपाल धितोपत्र बोर्डलाई यससम्बन्धी आवश्यक नियमावली तथा नीतिगत पूर्वाधार तयार गर्न निर्देशन दिएको हो ।

मन्त्रालयद्वारा जारी कार्ययोजनाको ११ औँ बुँदामा सूचीकृत संगठित संस्थाहरूको प्रबन्धपत्र तथा नियमावलीमा भएको व्यवस्था अनुरूप कम्पनीको सेयर पुँजीलाई अङ्कित मूल्यभन्दा बढी वा घटी मूल्यमा एकीकृत वा विभाजन गर्न सकिने उल्लेख छ । साथै, कम्पनीहरूले लाभांशका रूपमा वितरण गर्न सक्ने सञ्चित मुनाफाको रकम उपयोग गरी आफ्नै सेयर खरिद गर्न पाउने व्यवस्थालाई व्यावहारिक रूपमा कार्यान्वयनमा ल्याउन भनिएको छ ।

धितोपत्र बोर्डले सरोकारवालाहरूसँग परामर्श गरी २०८३ माघ मसान्तभित्र यससम्बन्धी नियामकीय तथा नीति–नियमलगायतका पूर्वाधार तयार पारिसक्नुपर्ने समयसीमा तोकिएको छ । अन्तर्राष्ट्रिय सेयर बजारमा सूचीकृत कम्पनीहरूले बजारमा सेयरको अत्यधिक आपूर्ति भई मूल्य घट्दा वा कम्पनीसँग पर्याप्त नगद सञ्चित हुँदा सेयर बायब्याक गर्ने गर्छन् ।

यसले बजारमा सेयरको आपूर्ति घटाई प्रतिसेयर आम्दानी बढाउन र सेयर मूल्यलाई स्थिर राख्न सहयोग पु¥याउँछ । सेयर बाय ब्याक सुविधाले नेटवर्थ राम्रो भएर पनि सेयर बजारमा राम्रो मूल्य पाउन नसकेका वाणिज्य बैंकहरुले फाइदा उठाउन सक्नेछ । त्यस्तै, उच्च मूल्य भएका सेयरलाई विभाजन गर्दा साना लगानीकर्ताको पहुँच वृद्धि भई बजारमा तरलता बढ्ने अपेक्षा गरिएको छ । यसले युनिलिभर जस्ता उच्च मूल्य भएका कम्पनीमा सर्वसाधारणको पहुँच बढ्नेछ ।