काठमाडौं । यो साता नेप्से परिसूचक बढेर बन्द भएको छ । यो साताभरको अवधिमा नेप्से परिसूचक करिब साढे ३ प्रतिशत बढेर बन्द भएको हो । नेप्से परिसूचक गत साता २५५९.४९ विन्दुमा बन्द भएको थियो भने या साता ३.४३ प्रतिशत अर्थात ८७.७३ अंक बढेर २६४७.२२ विन्दुमा बन्द भएको छ ।

यो साता पुरै पाँच कारोबार दिनका लागि बजार खुलेको थियो । जसमध्ये चार कारोबार दिन नेप्से बढेर बन्द भएको थियो भने एक कारोबार दिन घटेर बन्द भएको थियो । यो साता फ्लोट इण्डेक्स ३.७८ प्रतिशत बढेको छ भने सेन्सेटिभ इण्डेक्स ३.८५ प्रतिशत र सेन्सेटिभ फ्लोट इण्डेक्स ३.९९ अंक बढेको छ । नेप्सेसँगै यस साता कारोबार रकम पनि बढेको छ । गत साता दैनिक औषतमा ४ अर्ब ९ करोड रुपैयाँको सेयर खरिदबिक्री भएको बजारमा यस साता दैनिक औषतमा ६ अर्ब १२ करोड रुपैयाँको सेयर किनबेच भएको छ । गत साताको तुलनामा यस साताको दैनिक औषत कारोबार रकम ४९.४१ प्रतिशत बढी हो । त्यस्तै, यस साता दैनिक औषत सेयर संख्या ५२.७० प्रतिशत बढेको छ भने दैनिक औषत कारोबार संख्या २३ प्रतिशत घटेको छ ।

यस साता नेप्सेको कुल बजार पूँजीकरण पनि ३.४३ प्रतिशत बढेको छ । गत साताको अन्तिम कारोबार दिन ४४ खर्ब २ अर्ब रुपैयाँ रहेको नेप्सेको कुल बजार पूँजीकरण, यो साता १ खर्ब ५० अर्ब रुपैयाँ बढेर ४५ खर्ब ५३ अर्ब रुपैयाँ पुगेको छ ।

यस साता १३ वटै उपसमूहको परिसूचक बढेको छ । जसमध्ये जीवन बीमा उपसमूहको परिसूचक सर्वाधिक ५.७५ प्रतिशत बढेको छ । गत साता ११ हजार २९९.२५ विन्दुमा बन्द भएको सो उपसमूहको परिसूचक यो साता ६४९.३६ अंक बढेर ११ हाजर ९४८.६१ विन्दुमा पुगेको छ । अंकका आधारमा पनि यस साता सबैभन्दा बढी सोही उपसमूहको परिसूचक बढेको हो ।

यस साता म्युचुअल फण्ड उपसमूहको परिसूचक सबैभन्दा कम ०.८७ प्रतिशत बढेको छ । गत साता १९.५० विन्दुमा रहेको सो उपसमूहको परिसूचक, यस साता ०.१७ अंक बढेर १९.६७ विन्दुमा पुगेको छ ।