काठमाडौं । काठमाडौं उपत्यकाका विभिन्न स्थानमा भन्सार छली गरी ल्याइएका सामान भण्डारण तथा बिक्री वितरण गरेकाे आरोपमा प्रहरीले तीन जनालाई पक्राउ गरेको छ।

काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले २०८३ असोज २ गते उपत्यकाका विभिन्न स्थानबाट उनीहरूलाई पक्राउ गरेको हो। पक्राउ परेकाहरूको गोदामबाट विभिन्न सामानसमेत बरामद गरिएको प्रहरीले जनाएको छ।

पक्राउ पर्नेमा सिन्धुली कमलामाई–८ घर भई हाल काठमाडौं कपन बस्ने ३६ वर्षीय नवराज चौलागाईं, काठमाडौं बूढानीलकण्ठ–१० कपनकी ३८ वर्षीया अस्मिता हुमागाईं र सिन्धुली कमलामाई–८ घर भई हाल काठमाडौं महानगरपालिका–९ बस्ने ३८ वर्षीय जनकप्रसाद न्यौपाने रहेका छन्।

प्रहरीका अनुसार नवराज र अस्मितालाई बूढानीलकण्ठ–१० कपनबाट तथा जनकप्रसादलाई काठमाडौं महानगरपालिका–७ चाबहिलबाट पक्राउ गरिएको हो। बरामद सामानसहित तीनै जनालाई थप अनुसन्धान तथा आवश्यक कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय, गौचर, काठमाडौं पठाइएको काठमाडौं उपत्यका अपराध अनुसन्धान कार्यालयले जनाएको छ।