काठमाडौं । साताको पहिलो कारोबार दिन सेयर बजार परिसूचक दोहोरो अंकले ओरालो लागेको छ । आजको कारोबार बन्द हुँदा नेप्से परिसूचक २२ दशमलव ३६ अंकले घटेर २४६४ दशमलव ४० विन्दुमा पुगेको हो ।

२४९४ विन्दुसम्म पुगेको बजार अन्तिममा २४६४ विन्दुमा रोकिएको हो । आज सेयर बजारमा कारोबार भएका कम्पनीमध्ये ४६ वटा कम्पनीको मात्रै सेयर मूल्य बढेको छ । १९३ कम्पनीको सेयर मूल्य घट्दा ५ कम्पनीको सेयर मूल्य भने स्थिर रहेको छ । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि २ दशमलव ५६ अंकले घटेर ४४४ दशमल ८९ विन्दुमा पुगेको छ ।

आज सेयर बजारमा १३ उप सूचकमध्ये १२ वटा उपसूचकको सेयर मूल्य घटेको छ भने एक वटाका मात्रै सेयर मूल्य बढेको छ ।

आज परिसूचकसँगै कारोबार रकममा पनि कमी आएको छ । अघिल्लो कारोबार दिन ४ अर्ब ८६ करोड बढीको कारोबार भएको बजारमा आज ४ अर्ब ५ करोड ६ लाख ५८ हजार ३६ रुपैयाँका कारोबार भएको छ । आज सेयर बजारमा ३२७ कम्पनीका १ करोड ३ लाख ११ हजार ८८५ कित्ता सेयर ५८ हजार ४०१ पटक खरिद बिक्री हुँदा उक्त रकम बराबारको कारोबार भएको हो ।

आज सेयर बजारमा एक कम्पनीको सेयर मूल्यमा नकारात्मक सर्किट लागेको छ ।