काठमाडौं । यो साता नेप्से परिसूचक करिब ३ प्रतिशत बढेर बन्द भएको छ । यो साता सेयर बजार परिसूचक गत साताको भन्दा २.७६ प्रतिशतले बढेर बन्द भएको हो । गत साताको अन्तिम कारोबार दिन २६७५ दशमलव ५१ विन्दुमा बन्द भएको नेप्से यो साताको अन्तिम कारोबार दिनसम्ममा २.७४ प्रतिशत अर्थात ७३ दशमलव २७ अंक बढेर २७४८ दशमलव ७८ विन्दुमा पुगेको छ । यो साताको ५ कारोबार दिनमध्ये ३ कारोबार दिन नेप्से बढेको थियो भने दुई कारोबार दिन नेप्से घटेको थियो । यस साताको मंगलबार र बुधबार नेप्से सामान्य अंक घटेको थियो । अन्य दिन भने सेयर बजार बढेको थियो ।

त्यस्तै यो साता सेन्सेटिभ इण्डेक्स ८ दशमलव ८५ अंक बढेको छ भने फ्लोट इण्डेक्स ४ दशमलव ८२ अंक र सेन्सेटिभ फ्लोट इण्डेक्स २ दशमलव ९६ अंक बढेको छ ।

नेप्सेसँगै यो साता दैनिक औषत कारोर रकममा पनि सुधार देखिएको छ । गत साता दैनिक औषतमा ४ अर्ब ७१ करोडको सेयर खरिदबिक्री भएको बजारमा यस साता दैनिक औषतमा ९ अर्ब ४४ करोडको सेयर किनबेच भएको छ । गत साताको तुलनामा यस साताको दैनिक औषत कारोबार रकम १००.१६ प्रतिशत बढेको हो । यस साता दैनिक औषत सेयर संख्या ८९.२४ प्रतिशत बढेको छ भने दैनिक औषत कारोबार संख्या ८५.५३ प्रतिशत बढेको छ ।

यस साता नेप्सेको कुल बजार पुँजीकरण पनि करिब ३ प्रतिशत बढेको छ । गत साताको अन्तिम कारोबार दिन ४२ खर्ब ५९ अर्ब रुपैयाँ रहेको नेप्सेको कुल बजार पुँजीकरण यो साता २.७६ प्रतिशत अर्थात १ खर्ब १७ अर्ब रुपैयाँ बढेर ४३ खर्ब ७६ अर्ब पुगेको छ । यो साता १३ उपसमूहमध्ये १२ उपसमूहको परिसूचक बढेको छ भने १ उपसमूहको परिसूचक घटेको छ । यस साता वित्त उपसमूहको परिसूचक सर्वाधिक ७.५६ प्रतिशत बढेको छ । गत साता ३४९७ दशमलव ४४ विन्दुमा बन्द भएको यो उपसूचक यो साता २६४ दशमलव ३३ अंक बढेर ३७६१ दशमलव ७७ विन्दुमा पुगेको छ । त्यस्तै, यस साता जलविद्युत उपसमूहको परिसूचक करिब ६ प्रतिशत बढेको छ भने विकास बैंक उपसमूहको परिसूचक ५ प्रतिशत बढेको छ ।

अंकका आधारमा भने यस साता जीवन बीमा उपसमूहको परिसूचक सर्वाधिक २८१ दशमलव ६९ अंक बढेको छ । यस साता व्यापार उपसमूहको परिसूचक भने ०.०२ प्रतिशत घटेको छ ।