काठमाडौं । आर्सनल, म्यानचेस्टर सिटी र बायर्न म्युनिख महिला च्याम्पियन्स लिग फुटबलको क्वाटरफाइनलमा प्रवेश गरेका छन् । लन्डनमा भएको खेलमा आर्सनलले युभेन्टसमाथि १–० को जित निकाल्दा लिना हर्टिगले गोल गरिन् ।

अर्को खेलमा खादिजा सावले दुई गोल गरेपछि सिटीले स्वीडेनको क्लब हम्मार्बीमाथि २–१ को जित निकालेको हो । समूह ‘डी’ मा चार खेलमा जित निकालेको सिटी सन् २०२१ पछि पहिलो पटक अन्तिम आठमा पुगेको हो । नर्वेको भालेरेंगामा बायर्न म्युनिखले १–१ गोलको बराबरी खेलेको थियो। आर्सनल, बायर्न र सिटीसँगै चेल्सी, लियोन र रियल मड्रिड क्वाटरफाइनल पुगिसकेका छन् ।

दुई पटकको डिफेन्डिङ च्याम्पियन बार्सिलोनाले अस्ट्रियाको च्याम्पियन सेन्ट पोल्टेनलाई ४–१ ले हरायो । क्याटलान क्लब आफ्नो समूहमा सिटीभन्दा तीन अंकले पछि परेको छ। तर, अन्तिम आठमा पुग्ने सम्भावना बलियो बनाएको छ । समूह ‘सी’ को शीर्ष स्थानमा रहेको बायर्नको १०, आर्सनलको ९, युभेन्टसको ३ र भालारेंगाको १ अंक छ ।