काठमाडौं । यो साता सुनको भाउमा ऐतिहासिक गिरावट देखिएको छ । यो साता सुनको मूल्य तोलामा १४ हजार ६०० रुपैयाँले घटेको हो । यो सातामा भएको सुनको मूल्यमा हालसम्मकै उच्च गिरावट हो ।

गत साताको शुक्रबार छापावाला सुनको मूल्य प्रतितोला १ लाख ६५ हजार ५०० रुपैयाँमा खरिदबिक्री भएको थियो । यो साताको अन्तिम कारोबार हिजो (शुक्रबार) सुनको मूल्य तोलामा १ लाख ५० हजार ९०० रुपैयाँमा झरेको छ । सरकारले सुन आयातमा लाग्ने भन्सार शुल्क २० प्रतिशतबाट घटाएर १० प्रतिशतमा झारेपछि सुनको मूल्यमा उच्च गिरावट देखिएको हो । सरकारले भन्सार घटाए पछिको पहिलो दिन सुनको मूल्य तोलामा एकै दिन १५ हजार ९०० रुपैयाँले घटेको थियो ।

अर्कोतर्फ अन्तराष्ट्रिय बजारमा समेत सुनको मूल्य निरन्तर घट्दो क्रममा रहेकोले नेपालमा सुनको भाउ घट्दै गएको देखिन्छ । यता चाँदीको भाउ पनि प्रतितोला ९५ रुपैयाँले घटेको छ । गत साताको शुक्रबारसम्ममा १ हजार ९४० रुपैयाँ रहेको चाँदीको मूल्य यो साताको मूल्य निर्धारण हुने अन्तिम दिन शुक्रबार घटेर १ हजार ८४५ रुपैयाँमा झरेको छ ।

सरकारले चाँदी आयातमा लाग्ने भन्सार शुल्क समेत १५ प्रतिशतबाट घटाएर १० प्रतिशतमा झारेको थियो । सोही कारण चाँदीको भाउ घटेको हो । गत साता सुन र चाँदीको भाउ घटे पनि बजारमा सुनको आपुर्ति भने निकै कम रह्यो । भाउ घटेपछि बजारमा सुनको अभाव नै हुन पुग्यो । सुन व्यवसायीले ग्राहकको अर्डर नै लिन छोडेको अवस्था थियो ।