काठमाडौं । यो साता नेप्से परिसूचक साढे २ प्रतिशत बढेर बन्द भएको छ । गत साता २६८० दशमलव ४४ विन्दुमा बन्द भएको नेप्से परिसूचक यो साता २.५२ प्रतिशत अर्थात ६७ दशमलव ६१ अंक बढेर २७४८ दशमलव ०५ विन्दुमा पुगेको हो ।

यो साताको ५ कारोबार दिनमध्ये तीन कारोबार दिन नेप्से बढेको थियो भने दुई कारोबार दिन नेप्से घटेको थियो । यस साताको पहिलो र अन्तिम कारोबार दिन नेप्से घटेको थियो । त्यस्तै यो साता सेन्सेटिभ इण्डेक्स ४ दशमलव ५३ अंक बढेको छ भने फ्लोट इण्डेक्स ३ दशमलव १० अंक र सेन्सेटिभ फ्लोट इण्डेक्स १ दशमलव ६६ अंक बढेको छ ।

नेप्से बढेपनि यस साता कारोबार रकम भने घटेको छ । गत साता दैनिक औषतमा ९ अर्ब ३९ करोडको सेयर खरिदबिक्री भएको बजारमा यो साता दैनिक औषतमा ७ अर्ब ८८ करोडको सेयर किनबेच भएको छ । गत साताको तुलनामा यस साताको दैनिक औषत कारोबार रकम १६.०८ प्रतिशत घटेको हो । यस साता दैनिक औषत शेयर संख्या २५.२२ प्रतिशत घटेको छ भने दैनिक औषत कारोबार संख्या १७.५२ प्रतिशत घटेको छ ।

यस साता नेप्सेको कुल बजार पुँजीकरण भने करिब ७ प्रतिशत बढेको छ । गत साताको अन्तिम कारोबार दिन ४२ खर्ब ६८ अर्ब रुपैयाँ रहेको नेप्सेको कुल बजार पूँजीकरण, यस साता ६.७५ प्रतिशत अर्थात २ खर्ब ८८ अर्ब रुपैयाँ बढेर ४५ खर्ब ५६ अर्ब पुगेको छ । विशाल बजार कम्पनीको संस्थापक सेयर सूचीकरण भएसँगै कुल बजार पुँजीकरण उच्च दरमा बढेको हो ।

यो साता १३ उपसमूहमध्ये १२ उपसमूहको परिसूचक बढेको छ भने एक उपसमूहको परिसूचक घटेको छ । यो साता व्यापार उपसमूहको परिसूचक सर्वाधिक २०.९६ प्रतिशत बढेको छ । त्यस्तै, यो साता विकास बैंक र जीवन बीमा उपसमूहको परिसूचक ४ प्रतिशतभन्दा बढी बढेको छ । अंकका आधारमा पनि यस साता व्यापार उपसमूहकै परिसूचक सर्वाधिक ७३२ दशमलव ८२ अंक बढेको छ । गत साता ३४९६ दशमलव ३७ विन्दुमा बन्द भएको यस उपसमूहको परिसूचक यस साता ४२२९ दशमलव १९ विन्दुमा पुगेको छ ।

यो साता म्युचुअल फण्ड उपसमूहको परिसूचक ०.२३ प्रतिशत घटेको छ । गत साता २१ दशमलव ९१ विन्दुमा बन्द भएको यस उपसमूहको परिसूचक, यो साता ० दशमलव ०५ अंक घटेर २१ दशमलव ८६ विन्दुमा झरेको छ ।