काठमाडौं । शनिबार भगवान बुद्धको जन्मस्थल लुम्बिनीमा विश्वशान्तिको कामना गर्दै विशेष पुँजा र दीप प्रज्वलन गरियो । मायादेवी मन्दिरमा आयोजित कार्यक्रममा प्रसिद्ध बौद्ध धर्मगुरु शाक्य गोंग्मा त्रिचेन रिन्पोछेले दीप प्रज्वलन गर्दै विश्वशान्तिका लागि प्रार्थना गरेका छन् ।

दीप प्रज्वलनपछिको कार्यक्रममा सम्बोधन गर्दै रिन्पोछेले लुम्बिनीबाट विश्वशान्तिका लागि प्रयास गर्नुपर्नेमा जोड दिए । उनले लुम्बिनीलाई केवल भगवान बुद्धको जन्मस्थलको रूपमा मात्र नभई, शान्ति र करुणाको केन्द्रका रूपमा स्थापित गर्नुपर्ने आवश्यकता औंल्याए । कार्यक्रममा लुम्बिनी विकास कोषका उपाध्यक्ष तथा संविधानसभा सदस्य डा. ल्हारक्याल लामाले भगवान बुद्धको जन्मस्थलमा रिन्पोछेलाई स्वागत गर्न पाएकोमा आफ्नो खुसी व्यक्त गर्नुभयो। उहाँले लुम्बिनीले विश्वभरका मानिसहरूलाई शान्ति, सद्भाव, र आध्यात्मिक चेतनाको सन्देश दिन महत्त्वपूर्ण भूमिका निर्वाह गरिरहेको बताए ।

रिन्पोछेले आफ्नो सम्बोधनमा भगवान बुद्धको जीवनसँग सम्बन्धित चार प्रमुख पवित्र स्थलहरूको महत्त्वबारे चर्चा गर्नुभयो—लुम्बिनी (जन्मस्थल), बोधगया (ज्ञान प्राप्ति स्थल), सारनाथ (प्रथम धर्मदेशना), र कुशीनगर (महापरिनिर्वाण)। उनले यी चार स्थलहरूमध्ये लुम्बिनीमा जीवनमा एकपटक अवश्य भ्रमण गर्न सबैलाई प्रेरणा दिए ।

यो विशेष कार्यक्रमले लुम्बिनीको सांस्कृतिक, ऐतिहासिक, र आध्यात्मिक महत्त्वलाई प्रबर्द्धन गर्दै शान्ति र करुणाको सन्देश विश्वभर फैलाउने उद्देश्य राखेको छ ।