काठमाडौं । सेयर कारोबार हुने साताको अन्तिम दिन सेयर बजारमा दोहोरो अंकको गिरावट आएको छ । अघिल्लो दिन ४५ अंकले बढेको बजार आज ३३ अंकले घटेर बन्द भएको हो ।

सेयर बजारमा देखिएको सुधार एक दिन पनि नटिकेर ३३ दशमलव ४२ अंकले घटेर २६८२ दशमलव २९ विन्दुमा पुगेको हो । यो अघिल्लो दिनको तुलनामा १.२३ प्रतिशतको गिरावट हो । त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ६ दशमलव ४४ अंकले घटेर ४५८ दशमलव २२ विन्दुमा पुगेको छ । आज सेयर बजारमा १३ उपसूचकमध्ये २ वटाको सेयर मूल्य बढेको छ भने बाँकी ११ वटको घटेको छ ।

आजको कारोबार बन्द हुँदा सेयर बजारमा ४० कम्पनीको सेयर मूल्य बढेको छ भने २०४ कम्पनीको सेयर मूल्य घटेको छ । परिसूचक उच्च अंकले घटेको दिन कारोबार रकममा भने सामान्य सुधार आएको छ । अघिल्लो दिन ५ अर्ब भन्दा माथिको कारोबार भएको बजारमा आज ६ अर्ब माथिको कारोबार भएको छ ।

आज सेयर बजारमा ३०४ कम्पनीका १ करोड २३ लाख ७१ हजार ३१८ कित्ता सेयर ६७ हजार १२८ पटक खरिद बिक्री हुँदा ६ अर्ब १४ करोड ४० लाख ६५ हजार ७७४ रुपैयाँ बराबरको कारोबार भएको छ ।