काठमाडौं । इंग्ल्यान्डले तेस्रो टि ट्वान्टी आई खेलमा वेष्ट इण्डिजमाथि ३७ रनको जित हात पार्दै सिरिजमा क्लिन स्विप गरेको छ । यसअघि सुरुवाती दुई खेल इंग्ल्यान्डले २१ रन र ४ विकेटले जितेको थियो ।

तेस्रो खेलमा जित्नलाई २४९ रनको विशाल लक्ष्य पछ्याएको वेष्टइण्डिजले २० ओभरमा ८ विकेट गुमाउँदै २ सय ११ रन बनायो । वेष्टइण्डिजका रोभम्यान पावेलले ४५ बलमा ९ चौका र ४ छक्कासहित सर्वाधिक ७९ रनको अविजित इनिंङ खेलेपनि जित्नलाई पर्याप्त भएन । कप्तान शाई होप २७ बलमा ३ चौका र ३ छक्कासहित ४५, शिम्रन हेटमायर २६, जेसन होल्डर २५, इभिन लुइस र जोनसन चाल्र्स समान ९ रनमा आउट भए । इंग्ल्यान्डका ल्युक वुडले ३, आदिल राशिदले २, बाइडेन केस,जेकोब बेथल र लियाम डावसनले समान १ विकेट लिए ।

त्यसअघि साउथह्याप्टनमा टस हारेर ब्याटिङको निम्तो पाएको इंग्ल्यान्डले २० ओभरमा ३ विकेट गुमाउँदै २ सय ४८ रन बनाएको थियो ।
इंग्ल्यान्डका ओपनर बेन डकेटले ४६ बलमा १० चौका र २ छक्कासहित सर्वाधिक ८४ रन बनाउँदै प्लेयर अफ द म्याच चुनिए । अर्का ओपनर जेमी स्मिथले २६ बलमा ४ चौका र ५ छक्कासहित ६० रन जोडे । ओपनर स्मिथ र डकेटले पहिलो विकेटलाई ८.५ ओभरमा १ सय २० रन जोड्दै इंग्ल्यान्डलाई सानदार सुरुवात दिलाएका थिए । त्यसपछि जस बटलर २२, ह्यारी ब्रुक ३५ र जेकोब बेथलले ३६ रनको योगदान दिए । वेष्टइण्डिजका अकिल हुसेन, गुडाकेश मोती र शेर्फान रदरफोर्डले समान १ विकेट लिए । तीन खेलमा १ सय ६५ रन बनाएका पूर्वकप्तान जस बटलर प्लेयर अफ द सिरिज चुनिए ।