काठमाडौं । खानी खोला हाइड्रोपावर कम्पनी लिमिटेडले जारी गरेको हकप्रद सेयरमा आवेदन दिन सकिने अन्तिम म्याद आज असोज ५ गतेसम्म कायम गरिएको छ। कम्पनीले भदौ ३ गतेदेखि हकप्रद निष्काशन खुला गरेको हो।

यसअघि भदौ ३१ गतेसम्म तोकिएको आवेदन अवधि हाल देशको असामान्य अवस्थालाई दृष्टिगत गर्दै फेरि थपिएको हो। यस अनुसार लगानीकर्ताले असोज ५ गतेसम्म आवेदन दिन पाउनेछन्।

कम्पनीले हाल कायम १ कित्ता बराबर नयाँ १ कित्ता दिने अनुपातमा हकप्रद सेयर निष्काशन गरिरहेको छ। यसमार्फत ४६ लाख ५७ हजार १४३ कित्ता सेयर जारी गरिएको छ, जसको कुल मूल्य ४६ करोड ५७ लाख १४ हजार ३०० रुपैयाँ बराबर हुन्छ।

यस प्रयोजनका लागि कम्पनीले असार २७ गते बुकक्लोज गरेको थियो। त्यसैले असार २६ गतेसम्म नेप्सेमा नाम दर्ता भएका सेयरधनीहरुले मात्र आवेदन दिन सक्नेछन्।

हकप्रद निष्काशन तथा बिक्री व्यवस्थापनको जिम्मा सिटिजन्स क्यापिटल लिमिटेडले लिएको छ। यसबाहेक लगानीकर्ताले कुमारी बैंकको ललितपुर शाखा, सिटिजन्स बैंक इन्टरनेशनलका कुमारीपाटी, ठिमी, विराटनगर, बिर्तामोड, वीरगञ्ज, सुर्खेत, जनकपुर, नेपालगञ्ज, नारायणगढ, धनगढी, पोखरा, बुटवल र हेटौंडा शाखाबाट पनि आवेदन दिन सक्नेछन्।

यस्तै, आस्बा सेवा प्रदान गर्ने बैंक तथा वित्तीय संस्थाबाट वा सीडीएससीको ‘मेरो सेयर’ प्रणालीमार्फत अनलाइनमार्फत पनि आवेदन दिन सकिने व्यवस्था गरिएको छ।

यस हकप्रद निष्काशनका लागि इक्रा नेपालले कम्पनीलाई इक्राएनपी सिंगल बी रेटिङ दिएको छ, जसले वित्तीय दायित्व पूरा गर्ने क्षमतामा उच्च जोखिम रहेको संकेत गर्दछ।