काठमाडौं । प्रधानमन्त्री सुशिला कार्कीले जेन–जेड आन्दोलनका क्रममा भएको दुःखद घटनाप्रति संवेदना प्रकट गर्दै दोषीलाई कानुनी कारबाही गर्ने दृढता जाहेर गरेकी छन् । देशबासीका नाममा गरिएको सम्बोधनमा उनले आन्दोलनकै क्रममा ज्यान गुमाएका विद्यार्थी र युवाको बलिदानलाई न्याय दिलाउने आश्वासन दिइन् ।

उनले मुलुकलाई दीर्घकालीन निकास दिन स्वतन्त्र र निष्पक्ष निर्वाचन अपरिहार्य भएको भन्दै फागुन २१ भित्रै चुनाव सम्पन्न गर्ने तयारी सरकार अघि बढाइरहेको जानकारी दिइन् । निर्वाचनका लागि आवश्यक पूर्वाधार निर्माणमा सरकार जुटिसकेको उनले उल्लेख गरिन् ।

प्रधानमन्त्री कार्कीले १८ वर्ष पुगेका सबै नागरिकलाई मताधिकार सुनिश्चित गर्न अध्यादेशमार्फत कानुन संशोधन गरिएको प्रष्ट पारिन् । यससँगै मतदाता नामावली अद्यावधिक गर्ने कार्य पनि सुरु भइसकेको उनको भनाइ थियो ।