सिन्धुपाल्चोकको जुगल गाउँपालिका–४ कातिकेमा उज्यालो नेपाल पार्टीको पहिलो गाउँपालिकास्तरीय आमसभा सम्पन्न भएको छ । एक हजारभन्दा बढी स्थानीयवासी सहभागी आमसभामा विभिन्न राजनीतिक दल परित्याग गरी पाँचवटा वडाका दुई सयभन्दा बढी स्थानीय उज्यालो नेपाल पार्टीमा प्रवेश गरेका छन् ।

पार्टीका केन्द्रीय अध्यक्ष कुलमान घिसिङलाई स्थानीयवासीले भव्य स्वागत गरेका थिए । सभालाई सम्बोधन गर्दै घिसिङले सुशासन, सामाजिक न्याय, समावेशी विकास र हरित क्रान्तिमार्फत आर्थिक रूपान्तरण गर्ने पार्टीको अवधारणा प्रस्तुत गरे ।

उनले जलस्रोत, कृषि, पर्यटन र वनजस्ता स्थानीय स्रोतसाधनको उपयोग गरी उत्पादन, औद्योगिकीकरण र रोजगारी सिर्जनामा जोड दिए । जुगलको विकासका लागि सडक, शिक्षा, स्वास्थ्य, जलविद्युत् र पर्यटनलाई प्राथमिकता दिनुपर्ने उनको भनाइ थियो ।

बाँकी वडा नम्बर ६ र ७ मा पनि भोलि पार्टी प्रवेश कार्यक्रम आयोजना गरिने पार्टीले जनाएको छ । पहिलो आमसभाको सहभागिता र पार्टी प्रवेशलाई आधार बनाउँदै उज्यालो नेपालले आगामी स्थानीय निर्वाचनमा जुगल गाउँपालिकाको नेतृत्व जित्ने दाबी गरेको छ ।