काठमाडौं । स्वास्थ्य बीमा बोर्डको निमित्त कार्यकारी निर्देशकमा डा. कृष्ण पौडेल नियुक्त भएका छन्। कार्यकारी निर्देशक डा. रघुराज काफ्लेले राजीनामा दिएपछि नेतृत्व रिक्त बनेको बोर्डमा स्वास्थ्य तथा जनसंख्या मन्त्रालयले डा. पौडेललाई निमित्त प्रमुखको जिम्मेवारी दिएको हो।

हाल स्वास्थ्य मन्त्रालयको नीति, योजना तथा अनुगमन महाशाखा प्रमुखको रूपमा कार्यरत डा. पौडेललाई बोर्डको नियमित कामकाज सञ्चालनका लागि आर्थिक र प्रशासनिक अधिकारसमेत प्रदान गरिएको मन्त्रालयले जनाएको छ।

स्वास्थ्य बीमा कार्यक्रम पछिल्लो समय गम्भीर संकटमा पर्दै गएपछि तत्कालीन कार्यकारी निर्देशक काफ्लेले पदबाट अलग हुने निर्णय गरेका थिए। बोर्ड नेतृत्वविहीन हुँदा बीमा कार्यक्रमको सेवा प्रवाह र भुक्तानी प्रक्रिया थप प्रभावित बनेको छ।

हाल देशभरका ५१० सेवा प्रदायक अस्पताललाई साढे १० अर्ब रुपैयाँभन्दा बढी भुक्तानी गर्न बाँकी रहेको छ। लामो समयदेखि भुक्तानी नपाउँदा कतिपय ठूला सरकारी अस्पतालले स्वास्थ्य बीमा कार्यक्रमअन्तर्गत दिँदै आएको सेवा नै बन्द गरिसकेका छन्।