काठमाडौं । टी–२० विश्वकप अन्तर्गत समूह चरणको अन्तिम खेलमा दक्षिण अफ्रिकाले जित निकालेको छ । भर्खरै सम्पन्न खेलमा अफ्रिकाले यूएईलाई ६ विकेटले हराएको हो । यो जितसँगै अफ्रिका अपराजित रहँदै ८ अंकसहित सुपर एटमा प्रवेश गर्यो । उसले समूहका चारै टोलि न्यूजिल्यान्ड, अफगानिस्तान, यूएई र क्यानडालाई हरायो ।

यूएईले दिएको १२३ रनको सामान्य लक्ष्य अफ्रिकाले १३.२ ओभरमै (४० बल बाँकी रहँदै) ४ विकेट गुमाएर भेट्टायो । उसका लागि डेवाल्ड ब्रेभिसले ३६, रायन रिकल्टनले ३० तथा एडेन मार्करमले २८ रन जोडे । बलिङतर्फ यूएईका हैदर अली, मुहम्मद जवादुल्लाह, मुहम्मद अरफान र मुहम्मद फारुकदले एक–एक विकेट लिए ।

त्यसअघि दिल्लीस्थित अरुण जेटली मैदानमा टस हारेर ब्याटिङमा उत्रिएको यूएईले २० ओभरमा ६ विकेट गुमाएर १२२ रन जोड्यो । अलिशान शराफुले सर्वाधिक ४५ रन बनाउँदा मुहम्मद वसिमले २२ तथा आर्यान्स शर्माले १३ रन जोडे । मुहम्मद अरफानले ११ रन बनाउँदा अन्य ब्याट्सम्यानले दोहोरो अंकमा रन जोड्न सकेनन् ।

बलिङतर्फ अफ्रिकाका कोर्विन बोस्चले तीन तथा एन्रिख नोर्ख्याले दुई विकेट लिँदा जर्ज लिन्डेले एक विकेट लिए । यस समूहबाट अफ्रिका र नूजिल्यान्डले सुपर आठमा स्थान बनाउँदा यूएई, अफगानिस्तान र क्यानडा बाहिरिए ।