काठमाडौं । गुजरात टाइटन्सले इन्डियन प्रिमियर लिग (आइपिएल) २०२६ मा पहिलो जित निकालेको छ । दिल्ली क्यापिटल्स लाई केवल १ रनको अन्तरले हराउँदै गुजरातले पहिलो जित हात पारेको छ ।

गुजरातले दिएको २११ रनको लक्ष्य पछ्याउँदै दिल्ली क्यापिटल्सले अन्तिम ओभरसम्म खेलमा रह्यो । तर अन्तिम क्षणको नाटकीय घटनाले खेलको निर्णय बदल्यो । डेभिड मिलर अन्तिम ओभरको दोस्रो बलमा २ रन चाहिनुहुँदा एक रन लिन चाहेनन् । यो निर्णय चर्चा बिषय बन्यो। अन्तिम बलमा प्रसिद्ध कृष्णा ले बाउन्सर फाल्दा मिलर त्यसलाई प्रहार गर्न सकेनन् ।

त्यसपछि जोस बटलर ले स्टम्प पछाडिबाट अ थ्रो गर्दै कुलदीप यादव लाई रन आउट गरेर गुजरातको जित निश्चित गरे। मैदानमा रन आउट भए पनि मिलरले अन्तिम बलको वाइडको सम्भावनाका लागि रिभ्यु गरे । रिभ्यू सफल भएन । पहिला ब्याटिङ गरेको गुजरातले ४ विकेटको नोक्सानीमा २ सय १० रन बनायो। कप्तान शुभमन गिल, जोश बटलर र वासिङ्टन सुन्दरले अर्धशतक बनाए ।४५ बल खेलेका गिलले ५ छक्का र ४ चौकासहित टोलीका लागि सर्वाधिक ७० रन बनाए ।

२७ बलमा बटलरले ५ छक्का र ३ चौकासहित ५२ र वासिङ्टनले ३२ बलमा ६ चौका र २ छक्कासहित ५५ रन जोडे। दिल्लीका मुकेश कुमारले २ विकेट लिए । जवाफमा दिल्लीले ८ विकेटको क्षतिमा २ सय ९ रन बनायो । दिल्लीका ओपनर केएल राहुलको ५२ बलमा ११ चौका र २ छक्कासहित ९२ रन छाँयामा पर्यो ।

अर्का ओपनर पाथुम निसंका र डेभिड मिलरले समान ४१ रन बनाए । निसंकाले २४ बलमा ६ चौका र १ छक्का तथा नटआउट रहेका मिलरले २० बलमा समान ३ छक्का र चौका प्रहार गरे । गुजरातका रशिद खानले ३ र प्रसिद्ध कृष्णले २ विकेट लिए । गुजरातको तेस्रो खेलमा यो पहिलो जित हो । दिल्लीले सुरुवातका दुई जितपछि पहिलो हार भोगेको छ ।