काठमाडौं । कुमारी बैंक लिमिटेडको नाफामा उल्लेख सुधार देखिएको छ । बैंकले सार्वजनिक गरेको चालू आवको तेस्रो त्रैमासिकसम्मको अपरिष्कृत वित्तीय विवरण अनुसार नाफामा उछाल देखिएको हो ।

वित्तीय विवरण अनुसार गत आवको चैत मसान्तसम्मको तुलनामा चालू आवको सोही अवधिमा नाफामा उछाल आएको छ भने अधिकांश वित्तीय सूचकहरूमा उल्लेख्य प्रगति गरेको देखिएको छ । गत आवको चैत मसान्तसम्म २८ करोड ५८ लाख रुपैयाँ खु्द नाफा कमाएको यस बैंकले त्यसको तुलनामा चालू आवको सोही अवधिमा १३६१.७६ प्रतिशतको उछाल सहित ४ अर्ब १७ करोड ८० लाख रुपैयाँ खुद नाफा कमाउन सफल भएको छ ।

त्यसैगरी समीक्षा अवधिमा बैंकको खुद ब्याज आम्दानी ७ अर्ब ८९ करोड ६५ लाख रुपैयाँबाट १७.८० प्रतिशतले बढेर ९ अर्ब ३० करोड २२ लाख रुपैयाँ पुगेको छ भने कुल सञ्चालन आम्दानी १० अर्ब ४९ करोड ५९ लाख रुपैयाँबाट २२.०८ प्रतिशतले बढेर १२ अर्ब ८१ करोड ३० लाख रुपैयाँ पुगेको छ । समीक्षा अवधिमा बैंकको इम्पेयरमेन्ट चार्ज ५ अर्ब १६ करोड ७१ लाख रुपैयाँबाट ६९.६८ प्रतिशतले घटेर १ अर्ब ५६ करोड ६९ लाख रुपैयाँमा झरेको छ । यसरी इम्पेयरमेन्ट चार्ज ठूलो मात्रामा घटेका कारण बैंकको नाफा बढ्न टेवा पुगेको हो ।

खुद नाफा बढेसँगै बैंकको सञ्चालन मुनाफा पनि ८५ करोड ८३ लाख रुपैयाँबाट ६५७.८० प्रतिशतले बढेर ६ अर्ब ५० करोड ४९ लाख रुपैयाँ पुगेको छ। गत चैत मसान्तसम्म बैंकको वितरणयोग्य मुनाफा ६ अर्ब ५० करोड ३ लाख रुपैयाँ ऋणात्मक रहेकोमा चालू आवको चैत मसान्तसम्म घटेर १ अर्ब ९८ करोड ९५ लाख रुपैयाँ ऋणात्मकमा झरेको छ। समीक्षा अवधिमा बैंकको प्रतिसेयर आम्दानी (ईपीएस) १.४५ रुपैयाँबाट बढेर २१.२४ रुपैयाँ पुगेको छ भने खराब कर्जा ६.९८ प्रतिशतबाट सामान्य घटेर ६.९४ प्रतिशत कायम भएको छ । बैंकको प्रतिसेयर नेटवर्थ १५८.५३ रुपैयाँ र बेस रेट ५.३५ प्रतिशत रहेको छ ।

चुक्ता पूँजी २६ अर्ब २२ करोड ५८ लाख रुपैयाँ रहेको यस बैंकको जगेडा कोषमा १७ अर्ब ३३ करोड ८४ लाख रुपैयाँ सञ्चिति रहेको छ । बैंकले चैत मसान्तसम्म २ खर्ब ७३ अर्ब २१ करोड २५ लाख रुपैयाँ ग्राहकमा कर्जा लगानी गरी ३ खर्ब ८१ अर्ब ६६ करोड ६६ लाख रुपैयाँ निक्षेप संकलन गरेको छ । चैत मसान्तसम्म आइपुग्दा बैंकको सम्पत्तिको कुल मूल्य ४ खर्ब ७४ अर्ब ३० करोड ६८ लाख रुपैयाँ नाघेको छ ।