काठमाडौं । बितेका २४ घण्टामा एक हजार ७ सय २० सवारी चालक सवारी नियम उल्लङ्घनको कारबाहीमा परेका छन् । यसबाट राज्यकोषमा आठ लाख ५८ हजार रुपैयाँ राजस्व दाखिला भएको छ ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेको १ सय ३६, नियमविपरीत ‘राइड सेयरिङ’ गरेका १ सय २४, ट्राफिक सङ्केत उल्लङ्घनकर्ता १ सय २९ र तीव्र गतिमा सवारीसाधन हुइँक्याएका १ सय ७५ जनालाई कारबाही गरिएको हो ।

यसैगरी, ‘लेन’ अनुशासन पालना नगर्ने २ सय ६, निषेधित क्षेत्रमा हर्न बजाउने २८, सडक पेटीमा सवारीसाधन पार्किङ गर्ने ९२, निर्धारित स्थानमा यात्री चढाउने र ओराल्ने नियम उल्लङ्घनकर्ता २० र अन्य सवारी नियम पालना नगरेका एक हजार ८ सय १० जनालाई कारबाही गरिएको हो ।