काठमाडौं । कागेश्वरी मनोहरा–६, मूलपानीस्थित बाल गीताञ्जली स्कुलमा आयोजित निःशुल्क आँखा तथा दन्त स्वास्थ्य शिविर सम्पन्न भएको छ। तिलगंगा आँखा प्रतिष्ठान, समाज डेन्टल अस्पताल, नेसनल ओपन स्काउट क्र्यू मूलपानी तथा बाल गीताञ्जली स्काउट ट्रुपको संयुक्त आयोजनामा शिविर सञ्चालन गरिएको थियो।

शिविरमार्फत सर्वसाधारणलाई निःशुल्क स्वास्थ्य सेवा प्रदान गरिएको आयोजकले जनाएको छ। शिविरमा आँखा सम्बन्धी ४८१ जना र दन्त उपचारतर्फ २३९ जनाले स्वास्थ्य परीक्षण तथा उपचार सेवा प्राप्त गरेका छन्। यसरी कुल ७२० जनाले शिविरबाट प्रत्यक्ष लाभ लिएका छन्।

त्यसैगरी, शिविरमा जाँचका क्रममा मोतियाविन्दु समस्या देखिएका २७ जनाको निःशुल्क उपचारको व्यवस्था गरिएको छ। तिलगंगा आँखा प्रतिष्ठानको सहकार्यमा ती बिरामीहरूको निःशुल्क शल्यक्रिया गरिने जनाइएको छ।

यस्तै, दृष्टि समस्यामा रहेका ११३ जनालाई निःशुल्क चस्मा वितरण गरिएको छ। शिविरमा सहभागी बिरामीलाई दाँतसम्बन्धी विशेष उपचार सेवामा समाज डेन्टल अस्पतालले २० प्रतिशतसम्म छुटको सुविधा समेत उपलब्ध गराउने जनाएको छ।

आयोजकले स्वास्थ्य सेवा पहुँचबाट टाढा रहेका समुदायलाई लक्षित गरी यस्ता कार्यक्रमले नागरिकलाई प्रत्यक्ष राहत र स्वास्थ्य सचेतना बढाउन महत्वपूर्ण भूमिका खेलेको उल्लेख गरेको छ।