काठमाडौं । सिद्धार्थ बैंक लिमिटेडको नाफामा सामान्य सुधार देखिएको छ । बैंकले सार्वजनिक गरेको गत आर्थिक वर्षको अन्तिमसम्मको अपरिष्कृत वित्तीय विवरण अनुसार साढे ४ प्रतिशतले नाफा बढेको हो ।

समीक्षा अवधिमा बैंकको नाफा सहित प्रतिसेयर आम्दानीमा वृद्धि आएको देखिएको छ । गत आवमा बैंकले ३ अर्ब ५१ करोड ९४ लाख रुपैयाँ खुद नाफा कमाएको छ । अघिल्लो आवमा बैंकले ३ अर्ब ३६ करोड ६६ लाख रुपैयाँको नाफा कमाएको थियो । बैंकले गत आवमा करीब ९ अर्ब ५ करोड १२ लाख रुपैयाँ खुद ब्याज आम्दानी गरेको छ । अघिल्लो आवमा बैंकको यस्तो आम्दानी ८ अर्ब ४३ करोड ९८ लाख रुपैयाँ रहेको थियो । त्यस्तै बैंकले गत आवमा १ अर्ब ८६ करोड ४७ लाख रुपैयाँ खुद फी तथा कमशिन आम्दानी गरेको छ । अघिल्लो आवमा यस्तो आम्दानी १ अर्ब ५८ करोड ४३ लाख रुपैयाँ रहेको थियो ।

त्यसैगरी बैंकले गत आवमा १२ अर्ब ५ करोड १६ लाख रुपैयाँ कुल सञ्चालन आम्दानी गरेको जुन अघिल्लो आवको ११ अर्ब ९ करोड ८६ लाख रुपैयाँको तुलनामा ८.५९ प्रतिशतले बढी हो । त्यस्तै बैंकको सञ्चालन मुनाफा पनि ४ अर्ब ९७ करोड ४८ लाख रुपैयाँबाट ५ अर्ब १६ करोड २७ लाख रुपैयाँ पुगेको छ । त्यस्तै बैंकको प्रतिसेयर आम्दानी (ईपीएस) २२.७६ रुपैयाँबाट २३.०६ रुपैयाँ पुगेको छ भने खराब कर्जा (एनपीएल) ०.६६ प्रतिशतबाट १.०६ प्रतिशत कायम भएको छ । बैंकको प्रतिसेयर नेटवर्थ २२५.१७ रुपैयाँ रहेको छ ।

चुक्ता पूँजी १४ अर्ब ८ करोड ९९ लाख रुपैयाँबाट १८ अर्ब २९ करोड ४४ लाख रुपैयाँ पुगेको छ । त्यस्तै बैंकको रिजर्भ कोषमा १६ अर्ब ९२ करोड रुपैयाँ सञ्चिति रहेको छ । बैंकको वितरणयोग्य मुनाफा घटेको छ । बैंकको वितरणयोग्य मुनाफा अघिल्लो वर्ष १ अर्ब ८३ करोड ७८ लाख रुपैयाँ रहेको थियो । गत आवमा भने घटेर १ अर्ब ७० करोड ५६ लाख रुपैयाँमा झरेको छ ।