काठमाडौं । सिन्धुपाल्चोकको भोटेकोशी गाउँपालिका–३ स्थित तातोपानी भन्सार क्षेत्रमा सुख्खा पहिरो खस्दा सशस्त्र प्रहरीको ब्यारेकसहित विभिन्न भौतिक संरचनामा क्षति पुगेको छ । घटनामा मानवीय क्षति भने भएको छैन ।

बिहीबार राति करिब १ बजेर १५ मिनेटमा तातोपानीस्थित सशस्त्र प्रहरी बल नेपाल बीओपीको उत्तरपश्चिमतर्फ रहेको करिब २०० देखि ३०० मिटर अग्लो डाँडाबाट सुख्खा पहिरो खसेको थियो । पहिरोबाट खसेका ढुंगा एकआपसमा ठोक्किएर उछिट्टिँदा बीओपी परिसरमा क्षति पुगेको हो ।

घटनाका कारण पहिलो लाइन ब्यारेकको एउटा झ्यालको सिसा फुटेको छ भने दोस्रो लाइन ब्यारेकको भित्तामा प्वाल परेको छ । उक्त ब्यारेकको जस्ताको छानोमा समेत ६ वटा प्वाल परेको सशस्त्र प्रहरीले जनाएको छ ।

त्यस्तै एउटा ड्युटी पोस्ट पूर्ण रूपमा क्षतिग्रस्त भएको छ भने अर्को ड्युटी पोस्टमा आंशिक क्षति पुगेको छ । सि.अ.को बाथरुमको भित्तामा समेत प्वाल परेको छ ।

ढुंगा लागेर हिमाली ज्याकेटमा प्वाल परेको, राष्ट्रिय झण्डा राखिएको पोल पूर्ण रूपमा क्षतिग्रस्त भएको तथा जिन्सी स्टोर भवनमा तीनवटा प्वाल परेको प्रहरीले जनाएको छ । मेनगेट अगाडिको सिँढीमा समेत क्षति पुगेको छ । घटनामा मानवीय क्षति नभए पनि पहिरोका कारण बीओपी परिसरका विभिन्न संरचनामा भौतिक क्षति पुगेको प्रहरीले जनाएको छ ।