काठमाडौं । पछिल्लो समय नेपाली बजारमा सुनको मूल्य लगातार रुपमा बढी रहेको छ । पछिल्लो एक हप्तामा मात्रै सुनको मूल्य तोलाको करिब १३ हजार रुपैयाँले बढेको हो ।

नेपाल सुनचाँदी व्यवसायी महासंघका अनुसार एक हप्ताको अवधिमा सुनको मूल्य १२ हजार ९०० रुपैयाँले बढेको छ । गत साउन १५ गते शुक्रबार सुनको मूल्य प्रतितोला २ लाख ८४ हजार रुपैयाँमा कारोबार भएकोमा साउन २२ गते शुक्रबारसम्म आइपुग्दा मूल्य १२ हजार ९०० रुपैयाँले बढेर प्रतितोला २ लाख ९६ हजार ९०० रुपैयाँ पुगेको हो ।

महासंघका अनुसार, गत साउन १७ गते आइतबार र साउन १८ गते सोमबार दुई दिन नै सुनको कारोबार स्थिर भइ प्रतितोला २ लाख ८४ हजार रुपैयाँमै कारोबार भएको थियो । साउन १९ गते मंगलबार भने सुन प्रतितोलामा २०० रुपैयाँले घटेर २ लाख ८३ हजार ८०० रुपैयाँमा कारोबार भएको थियो । साउन २० गते बुधबार देखि भने सुनको मूल्य लगातार बढ्न थाल्यो । बुधबार एकैदिन ४ हजार २०० रुपैयाँले बढेको सुनको मूल्य उक्त दिन २ लाख ८८ हजार रुपैयाँमा कारोबार भएको थियो ।

त्यस्तै, साउन २१ गते बिहीबार एकैदिन सुनको मूल्य ८ हजार रुपैयाँले बढ्यो । त्यो दिन नेपाली बजारमा सुनको मूल्य २ लाख ९६ हजार रुपैयाँ पुगेको थियो । त्यस्तै, साउन २२ शुक्रबार पनि सुनको मूल्य प्रतितोलामा ९०० रुपैयाँले बढेर २ लाख ९६ हजार ९०० रुपैयाँमा कारोबार भएको हो ।