म्याग्दी। म्याग्दीको बेनी नगरपालिकाले पहिरोमा ज्यान गुमाएकाको परिवारलाई आज राहत वितरण गरेको छ । यही साउन ११ गते बेनी नगरपालिका-३ चिनाखेतमा गएको पहिरोमा पुरिएर ज्यान गुमाएका ७० वर्षीय लालबिर छन्त्यालका परिवारलाई नगरपालिकाले रु दुई लाख राहत उपलब्ध गराएको हो ।

नगरप्रमुख सुरत केसी, उपप्रमुख ज्योति लामिछाने, प्रमुख प्रशासकीय अधिकृत अर्जुन शर्मा, वडाध्यक्ष पदम पुन, कार्यपालिकाको विपद् व्यवस्थापन समितिका संयोजक अणबहादुर खड्का, वडा नम्बर ८ का वडाध्यक्ष उत्तम कर्माचार्य, कार्यपालिका सदस्य मनकुमारी विकलगायतको टोलीले राहत वितरण गरेको हो ।

मृतक छन्त्यालकी श्रीमती दिलमतीलाई नगरप्रमुख केसीले नगद हस्तान्तरण गरेका थिए। पहिरोमा पुरिएर लालबिरको मृत्यु र दिलमती घाइते भएका थिए। पहिरोका कारण पन्ध्र परिवार जोखिममा परेका छन् भने आमा समूहको सामुदायिक भवन र खेलमैदानमा बाढी पसेर पुरिएको छ ।

खेतबारी र सुन्तला बगैँचा पुरिएको छ । नगरपालिकाको टोलीले पहिरोले क्षति पुर्‍याएको क्षेत्रको निरिक्षण गर्दै रोकथाम र क्षति न्युनिकरणका लागि सहयोग गर्ने प्रतिबद्धता जनाए । यसअघि मृतकका परिवारलाई गण्डकी प्रदेश सरकारले जिल्ला प्रशासन कार्यालयमार्फत किरियाखर्चबापत रु ५० हजार सहयोग गरेको थियो ।