काठमाडौं । पेरिस सेन्ट जर्मेन (पिएसजी) ले एस्टन भिल्लालाई २-१ ले पराजित गर्दै युइएफए सुपर कपको उपाधि लगातार दोस्रोपटक जितेको छ। रेड बुल एरिनामा बुधबार राति भएको फाइनलमा पिएसजीले २०औँ मिनेटमा ख्विचा क्वारात्स्खेलियाको गोलबाट अग्रता लियो। तर, पहिलो हाफको अन्तिम मिनेटमा एस्टन भिल्लाका १७ वर्षीय ब्रायन माड्जोले गोल गर्दै खेल बराबरीमा ल्याए।

पिएसजीका डिजिरे डुएले ६२औँ मिनेटमा निर्णायक गोल गरे। अफसाइडको सम्भावनालाई भीएआरमार्फत जाँच गरेपछि उनको गोलले मान्यता पाएको थियो।

योसँगै च्याम्पियन्स लिग विजेता पिएसजीले गत वर्ष जितेको उपाधि रक्षा गरेको छ। उसले गत वर्ष टोटनहम हटस्परलाई पेनाल्टी सुटआउटमा पराजित गर्दै पहिलोपटक सुपर कप जितेको थियो।

माड्जोका लागि भने सुपर कपको फाइनल विशेष रह्यो। मेट्जबाट जनवरीमा १ करोड पाउन्डमा भिल्ला गएको उनले फिफाको प्रतिबन्धका कारण ८ महिनासम्म प्रतिस्पर्धात्मक खेल खेल्न पाएका थिएनन्।

सिएएसले अगस्टको सुरुवातमा भिल्लाको अपिल स्वीकार गरेपछि उनले मैदानमा उत्रिने अवसर पाएका थिए। डेब्यु खेलमै गोल गरेका माड्जो सुपर कपमा गोल गर्ने सबैभन्दा कम उमेरका खेलाडीसमेत बने।

पराजित भए पनि भिल्लाले खेलमा पिएसजीलाई दबाबमा राखेको थियो। उसका केही प्रहारलाई पिएसजीका गोलरक्षक माट्भे साफोनोभले उत्कृष्ट बचाउ गर्दै रोके। तर, यो हारसँगै भिल्लाका प्रशिक्षक उनाइ एमरीको सुपर कपको फाइनलमा उपाधि जित्ने प्रयास फेरि असफल भएको छ।