काठमाडौं । इंग्लिस प्रिमियर लिगमा फर्किएको हल सिटीले पहिलो खेलमै म्यानचेस्टर युनाइटेडलाई २–० ले पराजित गर्दै उत्कृष्ट सुरुवात गरेको छ। एमकेएम स्टेडियममा हलको जितमा सेमी अजायी र नोबेल मेन्डीले गोल गरे। यो प्रिमियर लिगमा म्यानचेस्टर युनाइटेडविरुद्ध हलको पहिलो जितसमेत हो।

सन् २०१६/१७ सिजनपछि पहिलोपटक शीर्ष डिभिजनमा फर्किएको हलले सुरुदेखि नै प्रभावशाली प्रदर्शन गर्‍यो। १७औँ मिनेटमा कर्नरमा युनाइटेडको कमजोर रक्षात्मक अवस्थाको फाइदा उठाउँदै अजायीले रिबाउन्डमा गोल गरे।

पहिलो हाफ सकिनुअघि नै हलले अग्रता दोब्बर बनायो। ३८औँ मिनेटमा रेगन स्लेटरको फ्रिकिकमा नोबेल मेन्डीले टच दिँदै बललाई जालीको दिशा दिए। गोलरक्षक सेने लामेन्सले बचाउने कुनै अवसर पाएनन्।

दोस्रो हाफमा युनाइटेडले बलमाथि बढी नियन्त्रण राख्दै खेलमा फर्कने प्रयास गर्‍यो। मार्कस रासफोर्ड पनि बेन्चबाट मैदान प्रवेश गरे। तर हलको बलियो रक्षापंक्तिविरुद्ध युनाइटेडले प्रभावकारी अवसर सिर्जना गर्न सकेन।

ब्रायन एम्बुमोले गोल गर्ने राम्रो अवसर पाए पनि उनको प्रहार हलका गोलरक्षक कोन्स्टान्टिनोस जोलाकिसले उत्कृष्ट बचाउ गर्दै रोके। म्याथियस कुन्हाको प्रयास पनि गोलमा परिणत हुन सकेन। हलले दोस्रो हाफमा पनि आक्रमण जारी राख्यो। मोहम्मद बेल्लौमीको आकर्षक प्रहार थोरैले बाहिरियो भने कोडी ड्रामेहको तल्लो प्रहार पनि लक्ष्यभन्दा बाहिर रह्यो।

अन्तिमसम्म युनाइटेडले गोल फर्काउन नसकेपछि हलले २–० को जित सुरक्षित गर्‍यो। प्रिमियर लिगमा पुनरागमन गरेको पहिलो खेलमै तीन अंक जोड्दै हलले च्याम्पियन आर्सनलसँगै अंकतालिकामा आफ्नो खाता खोलेको छ।