काठमाडौं । चेल्सीले एस्टन भिल्लाका अर्जेन्टिनी गोलरक्षक एमिलियानो मार्टिनेजलाई ७.५ मिलियन पाउन्डमा अनुबन्ध गर्न सहमति गरेको छ। ३३ वर्षीय मार्टिनेजले लन्डनमा मेडिकल परीक्षण गरेपछि चेल्सीमा आबद्ध हुनेछन्। उनको आगमनले स्टामफोर्ड ब्रिजमा गोलरक्षकको समूह थप बलियो हुने अपेक्षा गरिएको छ।

चेल्सीले पछिल्लो समय पहिलो रोजाइका गोलरक्षक रोबर्ट सान्चेजको प्रदर्शनलाई लिएर चिन्ता व्यक्त गर्दै आएको थियो। विशेषगरी सोमबार फुलहममाथि ३-२ को जितमा सान्चेजको प्रदर्शनपछि क्लबले गोलरक्षकको विकल्प खोज्ने निर्णय गरेको हो।

त्यो खेलमा सान्चेजले जोस किङको प्रहार नियन्त्रण गर्न नसक्दा बल हातबाट फुत्किएको थियो। दोस्रो हाफमा पनि उनले अर्को प्रहार खतरनाक क्षेत्रमा खसाल्दा गोन्जालो गार्सियाले गोल गरेका थिए। सान्चेजलाई निरन्तर समर्थन गर्ने पक्षमा रहेको चेल्सीले स्थानान्तरणको अन्तिम मिति नजिकिँदै गर्दा आफ्नो निर्णय परिवर्तन गर्दै मार्टिनेजलाई भित्र्याउन लागेको हो।

चेल्सीसँग १७ मिलियन पाउन्डमा जेन्कबाट अनुबन्ध गरिएका माइक पेन्डर्स पनि गोलरक्षकका रूपमा विकल्पमा छन्। उनले बिहीबार राति लुटन टाउनविरुद्ध काराबाओ कपमा चेल्सीका लागि डेब्यु गर्ने सम्भावना छ। पार्माबाट जापानी गोलरक्षक जियोन सुजुकीलाई करिब ३० मिलियन पाउन्डमा अनुबन्ध गरेपछि एस्टन भिल्ला मार्टिनेजलाई बेच्न तयार भएको थियो।

चेल्सी र भिल्लाबीच पछिल्लो समय खेलाडी कारोबारका धेरै सम्झौता भएका छन्। चेल्सीले भिल्लाबाट मोर्गन रोजर्सलाई क्लब कीर्तिमानी १ सय १७ मिलियन पाउन्डमा अनुबन्ध गरेको थियो। त्यस्तै, एलेजान्द्रो गार्नाचो गत महिना प्रारम्भिक लोन सम्झौतामा भिल्ला पुगेका थिए।

करिब ६५ मिलियन पाउन्ड मूल्यांकन गरिएका स्ट्राइकर निकोलस ज्याक्सन पनि बिहीबार भिल्ला पार्कमा मेडिकल परीक्षण गराइरहेका थिए। उनी पूर्व भिल्लारियल प्रशिक्षक उनाइ एमरीसँग पुनर्मिलनको तयारीमा छन्। चेल्सी र भिल्लाबीचको सम्बन्ध पछिल्ला वर्षहरूमा निकै नजिक देखिएको छ। यी दुई क्लब ‘पीएसआर स्वाप’ भनिएको सम्झौतामा पनि संलग्न थिए। उक्त सम्झौतामा डिफेन्डर इयान मात्सेन भिल्ला पुगेका थिए भने ओमारी केलीम्यान चेल्सी आएका थिए। केलीम्यान अहिले स्ट्रासबर्गमा छन्।

मार्टिनेजलाई अनुबन्ध गर्न युभेन्टसले पनि यसै स्थानान्तरण विन्डोमा प्रयास गरेको थियो। तर उनको औँलाको चोटलाई लिएर देखिएको चिन्ताका कारण उक्त सम्झौता अघि बढ्न सकेन। त्यसपछि युभेन्टसले टोटनहमका गोलरक्षक गुलिएल्मो भिकारियोलाई लोनमा अनुबन्ध गरेको थियो।