काठमाडौं । नेपालमा हालै आएको विनाशकारी आकस्मिक बाढी र पहिरोपछि भारत सरकारले उद्धार तथा राहत कार्यका लागि १३० टनभन्दा बढी मानवीय सहायता सामग्री हस्तान्तरण गरेको छ।

भारतीय वायुसेनाका विशेष विमानमार्फत उपलब्ध गराइएको उक्त राहत सामग्रीमा आपतकालीन औषधि, खाद्यान्न, अस्थायी टेन्ट, कम्बल, सोलार बत्ती र सरसफाइ किटका साथै बेली ब्रिज (Bailey Bridges) तथा डिएनए (DNA) परीक्षणका लागि प्रयोग हुने फोरेंसिक किटहरू समेत समावेश छन्।

भारतीय विदेश मन्त्रालयका अनुसार राहत सामग्रीसँगै प्राविधिक टोली, टनेल उद्धार विज्ञ र फोरेंसिक विशेषज्ञ गरी ५४ जनाको विशेषज्ञ टोली पनि नेपाल पठाइएको छ। यस सहायताले बाढी प्रभावित क्षेत्रमा भइरहेको खोजी, उद्धार तथा पुनर्निर्माणका काममा ठूलो सहयोग पुग्ने विश्वास लिइएको छ। दुई देशबीचको छिमेकी सम्बन्ध र भाइचारालाई पुन: पुष्टि गर्दै भारतले संकटको यस घडीमा नेपाललाई आवश्यक सबै सहयोग निरन्तर जारी राख्ने प्रतिबद्धता जनाएको छ।