काठमाडौं । नेपाल र ग्रेनाडाबिच औपचारिक रूपमा कूटनीतिक सम्बन्ध स्थापना भएको छ । ग्रेनाडासँग कूटनीतिक सम्बन्ध स्थापना भएसँगै नेपालले कूटनीतिक सम्बन्ध कायम गरेका देशको सङ्ख्या १८६ पुगेको छ ।

अमेरिकास्थित संयुक्त राष्ट्रसंघका लागि नेपालको स्थायी नियोगमा अमेरिकी समय अनुसार मंगलबार भएको एक कार्यक्रममा नेपालका परराष्ट्रमन्त्री शिशिर खानाल र ग्रेनाडा सरकारका अर्थमन्त्री डेनिस कोर्नवालले कूटनीतिक सम्बन्ध स्थापना गर्ने संयुक्त विज्ञप्तिमा हस्ताक्षर गरेका हुन् ।

हस्ताक्षर समारोहअघि दुवै मन्त्रीले आपसी हितका विभिन्न विषयमा छलफल गरेका थिए । उनीहरूले दिगो विकास लक्ष्य हासिल गर्ने दिशामा सहकार्य गर्ने तथा जलवायु परिवर्तनका असर सम्बोधन गर्ने क्षेत्रमा काम गर्ने सहमति गरेको नियोगले जनाएको छ ।