काठमाडौं । नेपाल स्टक एक्सचेञ्ज (नेप्से)मा दुई बैंकको सेयरमूल्य समायोजन भएको छ । नेप्सेमा नबिल बैंक र गरिमा विकास बैंकको सेयरमूल्य समायोजन भएको हो ।

साधारण सभा तथा लाभांश वितरण प्रयोजनार्थ यी बैंकहरुले बुकक्लोज गरेसँगै नेप्सेले सेयरमूल्य समायोजन गरी नयाँ मूल्य निर्धारण गरेको हो । नेप्सेले नबिलको ५ प्रतिशत र गरिमाको १० प्रतिशत बोनस सेयर समायोजन गरेको हो । समायोजनपश्चात नबिल बैंकको सेयरमूल्य ५३९ रुपैयाँ ५ पैसा कायम भएको छ भने गरिमाको ४१४ रुपैयाँ ५५ पैसा कायम भएको छ ।

नेप्सेले अघिल्लो कारोबार दिनको अन्तिम मूल्यका आधारमा बैंकको सेयरमूल्य समायोजन गरेको हो । अघिल्लो कारोबार दिन अर्थात मंगलबार दोस्रो बजारमा नबिलको सेयर प्रतिकित्ता ५६६ रुपैयाँमा र गरिमाको ४५६ रुपैयाँमा अन्तिम कारोबार भएको थियो । यही समायोजित मूल्यलाई आधार मानेर आज दोस्रो बजारमा यी बैंकहरुको कारोबार खुल्नेछ ।