सिन्धुपाल्चोक शेर्पा समाज सेवाको आयोजनामा सञ्चालन भएको मणि बुम तथा ञुङ्ने (मौन व्रत) धार्मिक कार्यक्रम बुधबार सम्पन्न भएको छ । काठमाडौंको सुन्दरटोलस्थित समाजको आफ्नै भवन (गुम्बा) मा आयोजित कार्यक्रममा बौद्ध धार्मिक विधिअनुसार पूजा तथा अनुष्ठान गर्दै सम्पूर्ण प्राणीको सुख, शान्ति र कल्याणको कामना गरिएको थियो ।

दशैंका अवसरमा पशुपन्छीको वध गर्ने प्रचलनको सट्टा अहिंसा, करुणा र प्राणीहितको सन्देश प्रवाह गर्ने उद्देश्यले कार्यक्रम आयोजना गरिएको आयोजकले जनाएको छ । कार्यक्रममा रसुवा–भोटेकोशी क्षेत्रको विनाशकारी बाढीपहिरोमा परी ज्यान गुमाएकाहरूको चिरशान्तिको कामनासमेत गरिएको थियो ।

श्रद्धेय टुल्कु ग ल्हखाङ रिन्पोछे तथा धर्मगुरु डा. टशी छिरिङ (एचबी लामा) को उपस्थितिमा सम्पन्न कार्यक्रममा मणि बुम पूजा तथा ञुङ्ने (मौन व्रत) सम्बन्धी धार्मिक अनुष्ठान गरिएको थियो ।

कार्यक्रमका पुण्यदाताका रूपमा जुगल गाउँपालिका–२, गोल्चेका रेशम स्याङ्बो र आनन्दी कुमारी बोम्जन रहेका थिए । कार्यक्रमको समापनका अवसरमा श्रद्धेय टुल्कु ग ल्हखाङ रिन्पोछेले व्रतालु तथा उपस्थित श्रद्धालुहरूलाई छेवाङ (आयु अभिषेक) प्रदान गरेका थिए ।

बौद्ध परम्परामा ञुङ्ने व्रतलाई शारीरिक, वाचिक तथा मानसिक संयम, करुणा र आध्यात्मिक साधनासँग जोडेर हेरिन्छ । मणि बुम तथा ञुङ्ने जस्ता धार्मिक अनुष्ठानले साधकहरूमा करुणा, अहिंसा र सम्पूर्ण प्राणीप्रतिको मैत्रीभाव अभिवृद्धि गर्ने विश्वास गरिन्छ ।

समाजका अध्यक्ष बहादुर शेर्पाका अनुसार संस्थाले वर्षभरि विभिन्न धार्मिक तथा सामाजिक गतिविधि सञ्चालन गर्दै बौद्ध परम्परा, करुणा र अहिंसाको सन्देश समुदायमा प्रवाह गर्दै आएको छ ।