म्यानचेस्टर सिटीका मिडफिल्डर फिल फोडेनले मंगलबार प्रोफेसनल फुटबलर्स एसोसिएसन (पिएफए) ‘प्लेयर अफ द इयर’ अवार्ड जितेका छन् । पेप ग्वार्डिओलाको सिटीले युइएफए सुपर कप र क्लब विश्वकपको उपाधि उचालेको थियो ।

यस्तै, एफए कप उपविजेता पनि बनेको थियो । इङ्ल्यान्डका २४ वर्षीय मिडफिल्डरले गत सिजन सबै प्रतियोगिताका ५३ खेलमा २७ गोल गरेका थिए । ‘यो पुरस्कार जित्नु निकै विशेष कुरा हो। यसका लागि म निकै गौरवान्वित र कृतज्ञ छु,’ उनले भने ।

फोडेनले सिटीका एर्लिङ हालान्ड तथा रोड्री, चेल्सीका कोल पामर, आर्सनलका मार्टिन ओडेगार्ड र एस्टन भिल्लाका ओली वाटकिन्सलाई पछि पारेका थिए । चेल्सीका २२ वर्षीय विंगर पामरले सिटी छाडेपछि लन्डन क्लबमा पहिलो सिजनमा प्रिमियर लिगमा ३४ खेलमा २२ गोल गरेका थिए ।