काठमाडौं । आईसीसी क्रिकेट विश्वकप लिग–२ को तयारीका लागि नेपाल क्रिकेट सङ्घ (क्यान) ले ‘कोर क्याम्प’ को घोषणा गरेको छ । क्याम्पका लागि ५२ जना खेलाडीलाई चार टिम बनाएर कोर क्याम्प सञ्चालन गरिने भएको हो ।

नेपाल निलो, नेपाल हरियो, नेपाल रातो र नेपाल पहेँलो गरी चार वटा टिममा विभाजन गरिएको छ । टोलीमा १९ वर्षमुनिको राष्ट्रिय टोलीका खेलाडी पनि समावेश छन् । नेपाल निलोको कप्तानमा राष्ट्रिय टोलीको नेतृत्व गरिरहेका रोहितकुमार पौडेल, नेपाल हरियोको कप्तानमा आसिफ शेख, नेपाल रातोको कप्तानमा सन्दीप लामिछाने र नेपाल पहेँलोको कप्तानमा दीपेन्द्रसिंह ऐरी छन् ।

माथिल्लो र तल्लो मूलपानी मैदानमा चार वटा टोलीका बीचमा अभ्यास खेल हुनेछ । क्याम्प आउँदो १३ गतेदेखि २० गतेसम्म राष्ट्रिय टोलीका मुख्य प्रशिक्षक स्टुअर्ट लको प्रत्यक्ष निगरानीमा सञ्चालन हुनेछ । क्याम्पबाट स्कटल्यान्डमा हुने शृङ्खलाका लागि खेलाडी छनोट गरिने छ ।
विश्वकप लिग–२ आउँदो जुनमा स्कटल्यान्डमा आयोजना हुँदैछ । नेपाल १२ खेलमा ६ अङ्कसहित सातौं स्थानमा छ ।