गत साता नेप्से परिसूचक करिब १ प्रतिशत घटेर बन्द भएको थियो। अघिल्लो साता ३००० दशमलव ८१ विन्दुमा बन्द भएको नेप्से, यस साता ०.८८ प्रतिशत अर्थात २६ दशमलव ३५ अंक घटेर २९७४ दशमलव ४६ विन्दुमा झरेको हो ।

गत साता ५ कारोबार दिनमध्ये ३ कारोबार दिन मात्र बजार खुलेको थियो । जसमध्ये १ कारोबार दिन बजार घटेको थियो भने दुई कारोबार दिन सामान्य अंक बढेको थियो । गत साता नेप्से प्रतिरोध परीक्षणमा देखिएको छ । हाल नेप्सेको प्रतिरोध क्षेत्र २९३० देखि ३००५ सम्म रहेको छ । गत साता नेप्सेले सोही क्षेत्र परीक्षण गरेको हो ।

यस साता सो प्रतिरोधलाई तोडेर उकालो लागेमा ३१७० देखि ३२३० को क्षेत्रमा प्रतिरोधको सामना गर्ने देखिन्छ । तर सो क्षेत्रबाट ओरालो लागेमा भने २६०० देखि २६६० को क्षेत्रमा टेवा पाउन देखिन्छ । गत साता साप्ताहिक रुपमा नेप्सेले बियरिश मैनबत्ती बनाएको छ । यसले सो साता बजारमा खरिदकर्ताको तुलनामा बिक्रीकर्ता हाबी रहेको संकेत गर्दछ । साताको अन्तिम कारोबार दिन भने नेप्सेले ग्रेभस्टोन डोजी मैनबत्ती बनाएको छ। यसले आगामी दिनमा बजार घट्न सक्ने संकेत गर्दछ ।

गत साता घटेपनि भोल्यूम भने बलियो रहेको छ । गत साता नेप्सेमा दैनिक औषतमा २२ अर्ब ३० करोड रुपैयाँ बराबरको सेयर खरिदबिक्री भएको थियो । साताको अन्तिम कारोबार दिन नेप्सेको २० दिने औषत भोल्यूम २० अर्ब ९६ करोड रुपैयाँ रहेको छ । २० दिने औषत भोल्यूमको तुलनामा गत साताको दैनिक औषत भोल्यूम ६.३९ प्रतिशत बढी हो ।