काठमाडौं। एर्लिङ हालान्डले ह्याट्रिकप्रेरित डिफेन्डिङ च्याम्पियन म्यान्चेस्टर सिटीले इङ्लिस प्रिमियर लिगमा वेस्टह्यम युनाइटेडमाथि सहज जित हासिल गरेको छ। शनिबार राति सम्पन्न खेलमा पाहुना टोली सिटीले वेस्टह्यम युनाइटेडलाई ३–१ ले पन्छाएको हो।

जितसँगै सिटीले उपाधि रक्षा यात्रा थप मजबुत बनाएको छ। शतप्रतिशत जित हासिल गरेको सिटी ९ अंकसहित शीर्ष स्थानमा उक्लिएको छ। समान खेलबाट तीन अंक बटुलेको वेस्टह्याम १४औं स्थानमा छ। जितमा तीनै गोल हालान्डले गरे। वेस्टह्यामले भने एक गोल उपहार पायो।

बर्नाल्डो सिल्भाको पासमा १०औं मिनेटमै हालान्डले सिटीलाई सुरुआती अग्रता दिलाएका थिए। तर, बल क्लियर गर्नेक्रममा सिटीका डिफेन्डर रुवेन डियासले १९औं मिनेटमा आफ्नै पोस्टमा गोल गरेपछि वेस्टह्याम खेलमा फर्कियो। वेस्टह्यामको त्यो खुसी १२ मिनेटपनि टिक्न सकेन। ३०औं मिनेटमा हाल्यान्डले दोस्रो गोल गर्दै सिटीको अग्रता बढाए। ८३औं मिनेटमा अर्को गोल गर्दै उनले ह्याट्रिक पूरा गरे। जारी लिगमा हाल्यान्डको यो दोस्रो ह्याट्रिक हो। उनले तीन खेलमा सात गोल गरिसकेका छन्।