काठमाडौं । यो साता नेपाली बजारमा सुनको मूल्यमा उतारचढाव देखिएको छ । समग्र साताभरमा सुन चाँदीको मूल्यमा गिरावट आएको सातामा सुन चाँदीको मूल्यमा उतारचढाब देखिएको हो ।

गत साताको अन्तिम कारोबार दिन अर्थात् कात्तिक १५ गते प्रतितोला १ लाख ७१ हजार रुपैयाँमा खरिदबिक्री भएको छापावाल सुनको मूल्य यो साताको अन्तिम कारोबार दिन १ लाख ६६ हजार ५०० रुपैयाँमा कारोबार भएको छ । यो साताभरमा सुनको मूल्य तोलामा ४ हजार ५०० रुपैयाँले घटेको नेपाल सुनचाँदी व्यवसायी महासंघले जनाएको छ ।

यो साताको मंगलबार छापावाल सुन प्रतितोला १ लाख ६८ हजार २०० रुपैयाँमा कारोबार भएको थियो । त्यस्तै, बुधबार तोलामा ३०० रुपैयाँ बढेर १ लाख ६८ हजार ५०० रुपैयाँमा खरिदबिक्री भएको थियो । बिहीबार भने सुनको मूल्य तोलामा ४ हजार रुपैयाँ घटेर १ लाख ६४ हजार ५०० रुपैयाँमा र शुक्रबार २ हजार रुपैयाँ बढेर १ लाख ६६ हजार ५०० रुपैयाँमा कारोबार भएको थियो ।

अमेरिकी राष्ट्रपतिको निर्वाचनको परिणामसँगै यस साता सुनको मूल्यमा उतारचढाव भएको संघले जनाएको छ । त्यसैगरी, अमेरिकी डलरले बनाएको नयाँ नयाँ अलटाइम हाइ रेकर्ड, फेडरल रिजर्भले घटाएको ब्याजदरका कारण पनि यस साता सुनको मूल्य प्रभावित भएको विश्लेषकहरुको भनाइ छ ।

यस साता चाँदीको मूल्यमा पनि उतारचढाव भएको छ । साप्ताहिक रुपमा चाँदीको मूल्य प्रतितोला ११० रुपैयाँ घटेको छ । कात्तिक १५ गते तोलाको २ हजार ९० रुपैयाँमा कारोबार भएको चाँदी, यस साताको मंगलबार २ हजार ३० रुपैयाँमा कारोबार भएको थियो। त्यस्तै, बुधबार प्रतितोला २ हजार १५ रुपैयाँ, बिहीबार १ हजार ९६० र शुक्रबार १ हजार ९८० रुपैयाँमा कारोबार भएको थियो ।