काठमाडौं । साताको अन्तिम कारोबार दिन सेयर बजारमा परिसूचक दोहोरो अंकले बढेको छ । अघिल्लो दिन घटेको सेयर बजार आज करिब १४ अंकले बढेको हो ।

आजको कारोबार बन्द हुँदा सेयर बजार १३ दशमलव ९५ अंकले बढेर २७४८ दशमलव ७८ विन्दुमा पुगेको छ । दिनभरको उत्तारचढाबबीच अन्तिममा सेयर बजार हरियाली भएको हो । आज सेयर बजारमा कारोबार भएका कम्पनीमध्ये १५९ कम्पनीको सेयर मूल्य बढेको छ भने ७९ कम्पनीको सेयर घटेको छ । त्यस्तै ६ कम्पनीको सेयर मूल्य भने स्थिर रहेको छ ।

आजको कारोबार बन्द हुँदा ‘क’ वर्गका कम्पनीको मापक सेन्सेटिभ इन्डेक्स पनि २ दशमलव ३३ अंकले बढेर ४८६ दशमलव ०३ विन्दुमा पुगेको छ । १३ उपसूचकमध्ये आजको कारोबार बन्द हुँदा ७ वटाको सेयर मूल्य बढेको छ भने ६ वटाको सेयर मूल्य घटेको छ ।

परिसूचकसँगै आज कारोबार रकममा पनि वृद्धि भएको छ । अघिल्लो दिन ७ अर्ब ९१ करोड बढीको कारोबार भएको बजारमा आज १० अर्बभन्दा बढीको कारोबार भएको छ । बिहीबारको कारोबार बन्द हुँदा सेयर बजारमा ३२१ कम्पनीका २ करोड १६ लाख ६० हजार ६३९ कित्ता सेयर १ लाख १ हजार ५४५ पटक खरिद बिक्री हुँदा १० अर्ब ३२ करोड ३ लाख ३१ हजार ४३६ रुपैयाँ बराबरको कारोबार भएको छ ।

आज सेयर बजारमा कारोबार भएका कम्पनीमध्ये तीन कम्पनीको सेयर मूल्यमा सकारात्मक सर्किट लागेर कारोबार बन्द भएको छ ।