काठमाडौं । बिहीबार सेयर बजार राताम्य भएर बन्द भएको छ । आजको कारोबार बन्द हुँदा सेयर बजार परिसूचक ३१ दशमलव ३१ अंकले घटेर बन्द भएको हो । आज सेयर बजार परिसूचक अघिल्लो दिनको भन्दा १.२५ प्रतिशतले घटेको छ ।

साताको कारोबार हुने अन्तिम दिनको बजार बन्द हुँदा नेप्से परिसूचक २६८० दशमलव ४४ विन्दुमा पुगेको छ । आज सेयर बजारमा कारोबार भएका कम्पनीमध्ये १९८ कम्पनीको सेयर मूल्य घटेको छ भने ४३ कम्पनीको सेयर मूल्य बढेको छ । त्यस्तै ३ कम्पनीको सेयर मूल्य स्थिर रहेको छ ।

त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ५ दशमलव ५३ अंकले घटेर ४७२ दशमलव ९७ विन्दुमा पुगेको छ । आज सेयर बजारमा १३ वटै उपसूचकको परिसूचक घटेको छ ।

नेप्से परिसूचक घटे पनि कारोबार रकममा भने सामान्य सुधार आएको छ । अघिल्लो दिन ७ अर्ब ९ करोडको कारोबार भएको बजारमा आज ८ अर्बभन्दा माथिको कारोबार भएको छ । आज ३१४ कम्पनीका १ करोड ८४ लाख ७४ हजार २४ कित्ता सेयर ८४ हजार ८५८ पटक खरिद बिक्री हुँदा ८ अर्ब २५ करोड ७६ लाख ४३ हजार ८८६ रुपैयाँ बराबरको कारोबार भएको छ ।

आज सेयर बजारमा दुई कम्पनीको सेयर मूल्यमा सकारात्मक सर्किट लागेको छ भने एक कम्पनीको सेयर मूल्यमा नकारात्मक सर्किट लागेको छ ।