काठमाडौं । स्पेनिस ला लिगको शीर्ष स्थानमा रहेको बार्सिलोनाले फ्रान्सेली क्लब ब्रेस्टलाई पराजित गर्दै च्याम्पियन्स लिगमा महत्त्वपूर्ण जित निकालेको छ । बुधवार बिहान सकिएको खेलमा बार्सिलोनाले ब्रेस्टमाथि ३–० को सहज जित दर्ता गराएको हो ।

घरेलु मैदानमा भएको खेलमा बार्सिलोनालाई जित दिलाउन रोबर्ट लेवान्डोस्कीले २ तथा डानी ओल्मोले १ गोल गरे । खेलको १०औं मिनेटमा पेनाल्टीमार्फत लेवान्डोस्कीले बार्सिलोनालाई सुरुवाती अग्रता दिलाएका थिए । ६६औं मिनेटमा बार्सिलोनाका ओल्मोले गोल गर्दै टोलीको अग्रता दोब्बरको बनाए । इन्ज्युरी समयमा लेवान्डोस्कीले आफ्नो व्यक्तिगत दोस्रो गोल गर्दै बार्सिलोनालाई ३–० को सहज जित दिलाए ।

यो जितसँगै बार्सिलोना ५ खेलबाट १२ अंकका साथ दोस्रो स्थानमा छ ।