काठमाडौं । वाणिज्य बैंकका प्रमुख कार्यकारी अधिकृत (सीईओ)हरूको छाता संस्था नेपाल बैंकर्स संघको नयाँ कार्य समिति चयन भएको छ । संघको ३८ औँ साधारणसभाबाट सन्तोष कोइरालाको अध्यक्षतामा नयाँ कार्यसमिति चयन भएको हो ।

माछापुच्छ्रे बैंकका सीईओ कोइराला सर्वसम्मत रुपमा संघको अध्यक्ष चयन भएका हुन् । साधारण सभामा अध्यक्ष, उपाध्यक्ष तथा तीन जना कार्यकारिणी समिति सदस्य चयन गरेको छ । कोइराला यस अघि संघको उपाध्यक्ष थिए । त्यस्तै उपाध्यक्षमा ग्लोबल आइएमई बैंक लिमिटेडका प्रमुख कार्यकारी अधिकृत सुरेन्द्रराज रेग्मी निर्विरोध निर्वाचित भएका छन् ।

यसै गरी सो साधारण सभाले कार्यकारिणी समितिका तीन जना सदस्यहरुमा एभरेष्ट बैंकका सीईओ सुदेश खालिङ, कुमारी बैंकका सीईओ राम चन्द्र खनाल र नेपाल बैंकका सीईओ तिलक राज पाण्डेय, निर्विरोध निर्वाचित भएका छन् ।