काठमाडौं । साताको सेयर कारोबार हुने पहिलो दिन आइतबार सेयर बजार राताम्य भएर बन्द भएको छ । आजको कारोबार बन्द हुँदा नेप्से परिसूचक २१ दशमलव ६३ अंकले घटेको हो ।

आइतबारको कारोबार बन्द हुँदा परिसूचक २७१४ दशमलव ८५ विन्दुमा पुगेको छ । यो अघिल्लो कारोबारभन्दा ० दशमलव ७९ प्रतिशतले कम हो । आज सेयर बजारमा कारोबार भएका कम्पनीमध्ये २०७ कम्पनीको सेयर मूल्य घटेको छ भने जम्मा ३१ कम्पनीको मात्रै सेयर मूल्य बढेको छ । त्यस्तै ६ कम्पनीको सेयर मूल्य स्थिर रहेको छ ।

त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ४ दशमलव ११ अंकले घटेर ४५४ दशमलव ९१ विन्दुमा पुगेको छ । आज १३ उपसूचकमध्ये १२ वटाको सेयर मूल्य घटेको छ भने एउटा उपसूचकको सेयर मूल्य मात्रै बढेको छ ।

परिसूचकसँगै आज कारोबार रकममा पनि गिरावट आएको छ । अघिल्लो दिन ८ अर्ब २३ करोड भन्दा माथिको कारोबार भएको बजारमा आज ६ अर्ब ८३ करोड ६६ लाख ४० हजार ४०७ रुपैयाँ बराबरको कारोबार भएको छ । आज सेयर बजारमा ३१६ कम्पनीका १ करोड ३९ लाख ७४ हजार ४५२ कित्ता सेयर ७९ हजार ३१ पटक खरिद बिक्री हुँदा उक्त कारोबार भएको हो ।