काठमाडौं । आईसीसी क्रिकेट विश्वकप लिग–२ को खेलमा नेपालले नेदरल्यान्ड्सलाई पराजित गरेको छ । स्कटल्यान्डको डुन्डीमा बुधबार भएको खेलमा नेपालले नेदरल्यान्ड्सलाई ५ विकेटले हराएको हो ।

नेदरल्यान्ड्सले दिएको २२६ रनको लक्ष्य नेपालले ४७ ओभर १ बलमा ५ विकेट गुमाएर पूरा गर्‍यो । नेपालका आरिफ शेखले सर्वाधिक ७८ रन बनाए । उनी ‘प्लेयर अफ द म्याच’ घोषित भए । यस्तै दीपेन्द्र सिंह ऐरीले ३८ रन जोडे । नेदरल्यान्ड्सका माइकल लेभिटले २ विकेट लिए ।
त्यसअघि टस जितेर ब्याटिङ रोजेको नेदरल्यान्ड्सले २२५ रन बनाएको थियो । स्कटल्यान्ड नोहा कोर्सले ४८ रन बनाए । नेपालका लागि सोमपाल कामीले ३ विकेट लिए । त्यस्तै करण केसी, ललित राजवंशी र सन्दीप लामिछानेले समान २–२ विकेट लिए । यसअघि भएको खेलमा नेपालले स्कटल्यान्डलाई १ विकेटले हराएको थियो ।

नेपाल १४ खेलमा १० अङ्कका साथ लिगको सातौं स्थानमा छ । नेदरल्यान्ड्स २१ खेलमा २६ अङ्कसहित दोस्रो स्थानमा यथावत् छ । स्कटल्यान्ड १७ खेलमा २० अङ्कका साथ चौथो स्थानमा छ । नेपालले अब अर्को खेल यही जेठ २५ गते स्कटल्याण्ड र २७ गते फेरि नेदरल्यान्ड्ससँग खेल्नेछ । आठ टोली सहभागी विश्वकप लिग–२ ओडीआई विश्वकप २०२७ को छनोट सिरिज हो ।

लिगको शीर्ष ४ मा रहने टोलीले विश्वकपको ग्लोबल छनोटमा सीधै स्थान बनाउने छ । पुछारमा रहने ४ टोलीले भने विश्वकप छनोट प्लेअफ खेल्नुपर्ने छ ।