काठमाडौं । आईसीसी टी ट्वान्टी विश्वकपको छनोटको तयारीमा रहेको नेपालले ओमानविरुद्धको अभ्यास खेलमा जित निकालेको छ । शनिबार भएको पहिलो अभ्यास खेलमा नेपालले ओमानलाई ६ विकेटले हराएको हो ।

ओमानले प्रस्तुत गरेको १११ रनको सामान्य लक्ष्य नेपालले मात्र ४ विकेट गुमाएर १७ ओभरमा पुरा गर्यो । नेपालको जितमा आसिफ शेखले ६१ रनको शानदार पारी खेले । रोहित पौडेलले २५ र कुशल भुर्तेलले ११ रन बनाए । कुशल मल्ल १० र सन्दीप जोरा १ रनमा नटआउट रहे ।

पहिले ब्याटिङ गरेको ओमानले ९ विकेटको क्षतिमा ११० रन बनाएको थियो । ओमानलाई सस्तैमा रोक्ने क्रममा सोमपाल कामी, सन्दीप लामिछाने र दिपेन्द्र सिंह ऐरीले समान दुई दुई विकेट लिएका थिए । आईसीसी टी ट्वान्टी विश्वकपको एसिया र इस्ट एसिया प्यासिफिक छनोट खेल्न नेपाली टिम ओमानमा रहेको छ ।

नेपालले विश्वकप छनोटको समूह चरणमा कुवेत र जापानसँग खेल्नेछ । समूह चरणको शीर्ष स्थानमा रहेको खण्डमा नेपाल सुपर सिक्समा छनोट हुनेछ । सुपर सिक्सको शीर्ष तीन टिमले अर्को वर्ष हुने टी ट्वान्टी विश्वकपमा स्थान बनाउनेछ ।