काठमाडौं । दशैँ बिदा पछि खुलेको सेयर बजारमा उच्च अंकको गिरावट आएको छ । असोज १२ गतेपछि पहिलो पटक खुलेको बजरमा ५८.५५ अंकको गिरवाट आएको हो ।

आजको कारोबार बन्द हुँदा परिसूचक २६०४.९६ विन्दुमा पुगेको छ । यो अघिल्लो कारोबार दिन भन्दा २.१९ प्रतिशतले कम हो । आज सेयर बजारमा २३५ कम्पनीको सेयर मूल्य घटेको छ भने १६ कम्पनीको मात्रै बढेको छ । त्यस्तै एक कम्पनीको सेयर मूल्य भने आज स्थिर रहेको छ ।

त्यस्तै आज ‘क’ वर्गका कम्पनीको मापक सेन्सेटिभ इन्डेक्स पनि ७.८८ अंकले घटेर ४५४.६२ विन्दुमा पुगेको छ । आज १३ उपसूचकमध्ये सबै उपसूचकको सेयर मूल्य घटेको छ । परिसूचक घटेको दिन बजारममा साढे ४ अर्ब माथिको कारोबार भएको छ ।

आज ३२६ कम्पनीका १ करोड ३ लाख ४५ हजार ९०३ कित्ता सेयर ५५ हजार ४५० पटक खरिद बिक्री हुँदा ४ अर्ब ६२ करोड ९० लाख ४२ हजार ६५६ रुपैयाँको कारोबार भएको छ । आज सेयर बजारमा गिरावट आए पनि एक कम्पनीको सेयर मूल्यमा भने सकारात्मक सर्किट लागेर कारोबार भएको छ । त्यस्तै एक कम्पनीको सेयर मूल्यमा नकारात्मक सर्किट लागेको छ ।