काठमाडौं । काठमान्डु गोर्खाजले नेपाल प्रिमियर लिग (एनपीएल)मा प्लेअफको सम्भावना बलियो बनाएको छ । आज भएको खेलमा कर्णाली याक्सलाई ५ विकेटले पराजित गर्दै उसले अन्तिम ४ मा पुग्ने सम्भावना बलियो बनाएको हो ।

लिगमा चौथो जित हात पार्दै काठमानडूले ८ अंक जोडेरे अंकतालिकामा दोस्रो स्थानमा उक्लिएको छ । यो सँगै उ प्लेअफ नजिक पुगेको छ । ६ खेल खेलेको काठमान्डुले ४ जित र २ हारको नतिजा निकालेको हो । विराटनगर किंग्ससँग समान अंक भए पनि रनरेटमा काठमान्डु अघि छ । पाँच खेलबाट १० अंक जोडेर सुदूरपश्चिम यसअघि नै प्लेअफ पुगिसकेको छ ।

उता पाँच खेलमा चौथो हार व्यहोरेको कर्णालीको भने प्लेअफ सम्भावना कमजोर बनेको छ । जेरार्ड एरासमस र जोन सिम्पसनले उत्कृष्ट ब्याटिङ गरेपछि कर्यालीले दिएको १५० रनको लक्ष्य काठमान्डुले १८ ओभरमा पाँच विकेट गुमाएर पूरा गरेको हो । काठमान्डुका लागि जेरार्ड एरसामसले अविजित ४३ रन बनाए । यस्तै सिम्पसनले ४१ रन योगदान गरे । एरसामस र सिम्पसनले चौथो विकेटका लागि ८६ रनको महत्वपूर्ण साझेदारी गरेका थिए ।

बलिङतर्फ कर्णालीका नन्दन यादवले ३ तथा पवन सर्राफले एक विकेट लिए । टस जितेर पहिले ब्याटिङ गरेको कर्णालीले २० ओभरमा ७ विकेट गुमाएर १४९ रन बनाएको थियो । कर्णालीका लागि सातौं नम्बरमा ब्याटिङ गरेका गुल्सन झाले अविजित ४९ रन जोडे । यस्तै पवन सराफले ३५ र मार्क वाटले ३० रन जोडे ।

बलिङमा काठमान्डुका रासिद खानले २ तथा कप्तान करण केसी, मिलिन्द कुमार र सन्तोष यादवले समान एक÷एक विकेट लिए ।