काठमाडौं । च्याम्पियन्स लिग अन्तिम १६ को पहिलो लेगमा लिभरपुल टर्कीको क्लब गालातासारेसँग १–० ले पराजित भएको छ । खेल इस्तानबुलमा भएको थियो । अब दोस्रो लेग मार्च १८ मा एनफिल्डमा हुनेछ ।

खेलको सातौँ मिनेटमै मारियो लेमिनाले हेडमार्फत गोल गर्दै गालातासारेलाई अग्रता दिलाए । यो सिजन कर्नरबाट लिभरपुलले बेहोरेको १०औँ गोल हो । घाइते गोलरक्षक अलिसनको स्थानमा खेलेका जियोर्गी ममार्दाशभिलीले गोल रोक्न सकेनन् । पछि ओसिम्हेनले अर्को गोल गरे पनि अफसाइडका कारण त्यो गोल मान्य भएन ।

लिभरपुलले खेलको ७०औँ मिनेटमा बराबरी गरेको जस्तो देखियो । डोमिनिक सोबोस्लाइको कर्नरबाट आएको बल गोललाइन पार गर्यो। तर भिएआर जाँचपछि बल इब्राहिमा कोनातेको ह्यान्ड भएको ठहर गर्दै गोल रद्द गरियो। खेलभर लिभरपुलले केही राम्रा अवसर बनायो। फ्लोरियन विट्र्स र इब्राहिमा कोनातेले गोल गर्ने मौका पाए पनि सफल हुन सकेनन्।

त्यस्तै स्पेनिस क्लब बार्सिलोना र इंग्लिस क्लब न्युक्यासलले १–१ गोलको बराबरी खेल ।