काठमाडौं । सिक्लेस हाइड्रोपावर लिमिटेडको लाभांश सुरक्षित गर्ने आज अन्तिम दिन रहेको छ । कम्पनीले आफ्ना २० औं र २१औं वार्षिक साधारणसभा तथा लाभांश वितरण प्रयोजनार्थ भोलि मंसिर १८ गते बुक क्लोज गर्ने भएकाले आजसम्म नेप्सेमा कारोबार भएका सेयरधनीहरुले मात्रै लाभांश प्राप्त गर्नेछन् ।

यस कम्पनीको साउन २५ गते बसेको सञ्चालक समितिको बैठकले गत दुई आर्थिक वर्षको संचित मुनाफाबाट आफ्ना सेयरधनीहरूलाई हाल कायम चुक्ता पुँजीको १५ प्रतिशत बोनस सेयर र ०.७८९ प्रतिशत नगद लाभांश वितरण गर्ने निर्णय गरेको थियो ।

उक्त निर्णय पारित गर्नका लागि यही मंसिर २९ गते सोमबार कास्की जिल्लाको पोखरा–१७ घारीपाटनस्थित आभ्या क्लबमा बिहान ११ बजेदेखि दुई आर्थिक वर्षको साधारणसभा एकै पटक बस्दैछ । सभाले बोनस सेयर वितरणपछि कायम हुने चुक्ता पुँजीको १ बराबर १ को अनुपातमा हकप्रद सेयर निष्कासन गर्ने, कम्पनीको प्रबन्धपत्र तथा नियमावलीमा आवश्यक संशोधन गर्ने र यसका लागि सञ्चालक समितिलाई अख्तियारी दिने प्रस्ताव पनि पारित गर्नेछ ।