काठमाडौं । आज पुस १७ गते बिहिबार सेयर बजारमा १४ वटा सूचीकृत कम्पनीको लाभांश सुरक्षित गर्ने अन्तिम अवसर रहेको छ। यी कम्पनीहरूले पुस १८, १९ र २० गतेका लागि बुक क्लोज मिति तोकेकाले आजसम्म सेयरधनी बनेका लगानीकर्ताले मात्रै सम्बन्धित लाभांश प्राप्त गर्न सक्नेछन्।

लघुवित्त, हाइड्रोपावर, इन्स्योरेन्स, फाइनान्स र दूरसञ्चार क्षेत्रका कम्पनीहरू यस सूचीमा परेका छन्। सेयरधनीले आजसम्म सेयर खरिद गरी सम्बन्धित कम्पनीको बोनस सेयर वा नगद लाभांश सुरक्षित गर्न सक्ने अवस्था बनेको हो। समता घरेलु लघुवित्त र मेरो माइक्रोफाइनान्सले पनि पुस ३० गते साधारणसभा बोलाएका छन्, जहाँ समताले ५ प्रतिशत बोनस र ०.२६३२ प्रतिशत नगद तथा मेरो माइक्रोफाइनान्सले ४.७५ प्रतिशत बोनस र ०.२५ प्रतिशत नगद लाभांश प्रस्ताव गरेका छन्।

स्वरोजगार लघुवित्त वित्तीय संस्थाले कुल १५ प्रतिशत लाभांश प्रस्ताव गरेको छ, जसअन्तर्गत १४.२५ प्रतिशत बोनस सेयर र कर प्रयोजनका लागि ०.७५ प्रतिशत नगद लाभांश समावेश छ। संस्थाको साधारणसभा माघ ३ गते हुने तय छ। ग्लोबल आईएमई लघुवित्तले ४.७५ प्रतिशत बोनस र ०.२५ प्रतिशत नगद लाभांश प्रस्ताव गरेको छ। कालिका पावर कम्पनीले ७ प्रतिशत बोनस सेयर र ०.३६८४ प्रतिशत नगद लाभांश दिने निर्णय गरेको छ।

सगरमाथा लुम्बिनी इन्स्योरेन्सले १५ प्रतिशत नगद लाभांश वितरण गर्ने प्रस्तावसहित साधारणसभा आह्वान गरेको छ। अरुण भ्याली हाइड्रोपावरले ५ प्रतिशत बोनस सेयरसहित ०.२६३० प्रतिशत नगद लाभांश वितरण गर्ने प्रस्ताव गरेको छ भने यसको साधारणसभा पुस ३० गते बस्नेछ।

श्री इन्भेष्टमेन्ट एण्ड फाइनान्सले ६.४ प्रतिशत नगद लाभांश घोषणा गरेको छ भने अपि पावर कम्पनीले ५ प्रतिशत बोनस सेयरसहित ०.२६३२ प्रतिशत नगद लाभांश वितरण गर्ने जनाएको छ। हिमालयन लघुवित्तले ६.६५ प्रतिशत बोनस सेयर र ०.३५ प्रतिशत नगद लाभांश प्रस्ताव गरेको छ भने सूर्यज्योति लाइफ इन्स्योरेन्सले १३ प्रतिशत नगद लाभांश घोषणा गरेको छ।

युनाइटेड इदीमार्दी एण्ड आरवि हाइड्रोपावरले ५ प्रतिशत बोनस र ०.२६ प्रतिशत नगद लाभांश दिने जनाएको छ। सिद्धार्थ प्रिमियर इन्स्योरेन्सले २५ प्रतिशत नगद लाभांश प्रस्ताव गरेको छ भने नेपाल टेलिकमले सबैभन्दा बढी ३० प्रतिशत नगद लाभांश दिने निर्णय गरेको छ।लगानीकर्ताले आजको कारोबार समाप्तिसम्म सेयर खरिद गरेमा यी सबै कम्पनीको लाभांशका लागि योग्य हुनेछन्।